Dempuèi que Patric Roux quitèt la direccion de l’Estivada de Rodés, lo festenal a cessat d’èsser l’eveniment pus important de la cultura occitana e de sa creacion artistica e audiovisuala. E mai se cap d’autre eveniment a reüssit a concentrar la cultura occitana d’Occitània tota, si que i a qualques eveniments que s’organizan amb aquel esperit d’occitanitat, de soslinhar lo 2d Forum Euroregional de Culturas Popularas en dialòg que se tendrà jos lo Pont de Gard los 18 e 19 de mai, lo festenal Escambis en Carcin del 18 al 20 de mai, e lo Balad’òc de Tula qu’aurà luòc en aquel país lemosin del 26 de mai al 2 de junh, e que deman ne publicarem lo programa. Jornalet es partenari d’aqueles tres eveniments. E mai, de mancar pas los eveniments venguts de referéncia e imprescindibles per que nòstra cultura recobre la santat, coma l’Escòla Occitana d’Estiu a Vilanòva d’Òlt, lo Hestivòc a Pau o lo Festen’òc a Saurat, entre d'autres.
 
Ongan, totun, la còla de Jornalet volèm conéisser l’èst d’Occitània e atal vesitar la Còsta d’Azur e lo Comtat de Niça entre lo 12 e lo 20 de mai. Profecharem de l’escasença per assistir al festenal de cinèma pus important d’Occitània e d’Euròpa. Pendent los darrièrs jorns del festenal de cinèma de Canas, la còla de Jornalet serem aquí per raportar l’eveniment sus plaça. 
 
Cresèm fermament que l’eveniment cultural mai mençonat e conegut del país nòstre, ont nòstra lenga a una preséncia nulla, deviá èsser raportat tanben dins la lenga del país e amb un vejaire occitan. Mentretant, serà un plaser de rescontrar durant aqueles jorns los legeires de Vencenc e de la Costièra Niçarda.