Publicàvem dimècres passat, dins la seccion d'opinion, una letra dobèrta de Vistedit a l'Ofici Public de la Lenga Occitana (ÒPLO). La societat que publica La Setmana, Plumalhon e Pagagai, demanda a l'ÒPLO que reconsidère sa decision d'acordar pas cap d'ajuda en 2018. Es indispensable, per l'avenir de la lenga, de sosténer sos mèdias, mai que mai aquel setmanièr istoric publicat dempuèi 23 ans.
 
Dins nòstre editorial del 22 d'abril, la còla de Jornalet explicàvem la davalada de las subvencions de l'ÒPLO a la Federacion Interregionala dels Mèdias Occitans (FIMÒC), que tant La Setmana coma Jornalet ne fan partida. Podiam pas creire que foguèsse del 70%, e ansin esperàvem que seriá una error. Autrament seriá una irresponsabilitat màger de part d'un organisme public portat per d’occitanistas conscientizats amb la volontat de se batre per l’interès de la lenga occitana.
 
Mas sembla qu'es atal. E la FIMÒC es a pensar a sa dissolucion del temps qu'a licenciat sa salariada, que fasiá un trabalh de tria per l'espaci occitan de comunicacion. En mai d'aquò, La Setmana risca de desaparéisser.
 
Las rasons evocadas per l'ÒPLO son las dificultats que las an patidas aquelas estructuras. Segon l’ofici, s’èra demandat a la FIMÒC de se tornar posicionar e s’es pas res fach, del temps que las publicacions per enfants e joves de Vistedit comptan solament qualques desenats d’abonats, e los de l’ÒPLO creson que cal subvencionar un autre actor per menar a bon tèrme aquela tòca. En mai d’aquò, cal apondre que l’ÒPLO pòt pas subvencionar La Setmana ni Jornalet, puèi que la lei francesa empedís lo poder public de finançar la premsa en nom, precisament, de l’independéncia de la premsa.
 
D'un caire, vesèm que l'ÒPLO jòga lo ròtle de jutge mai que de partenari financièr. De l'autre, i vesèm una manca de volontat. Se la lei empedís d’ajudar los mèdias d'un biais, es evident que s’òm vòl, òm pòt trobar una autra manièra d'ajudar, siá per mejan de la publicacion de publicitat institucionala, siá per mejan d'acòrdis de cooperacion, o siá per d'autres mejans. Solament se pòt pas quand se vòl pas.
 
La situacion es grèva e urgenta. La còla de Vistedit fa un apèl al mond que creson que l'ÒPLO deu reconsiderar lo retirament de la subvencion. O podètz sosténer en signant e mandant la letra de Vistedit (de descargar aicí), o simplament en escrivent a l'ÒPLO en lor demandant que torne sus son retirament de las subvencions a Vistedit e a la FIMÒC.
 
La letra la podètz mandar per la pòsta a:  
O ben per e-mail en emplegant lo formulari de contacte del web de l'ÒPLO.
 
La còla de Jornalet sostenèm nòstres confraires de La Setmana, amb qui avèm un acòrdi de cooperacion. Per tant, volèm empénher nòstres legeires que creson que l'ÒPLO deu tornar sus sa decision, a respondre a la crida que la fa Vistedit.
 
De remarcar que Jornalet a pas recebut cap de subvencion publica autra que la de la Generalitat de Catalonha. A l'ora d'ara, la font de ressorsas financièras pus importanta de Jornaletson los escotissons dels membres de l'ADÒC e dels Amics de Jornalet.