Bearn es vengut un país en movement per la lenga occitana. Aquesta dimenjada s'es festejada la primièra edicion de "La Passem!", una corsa de relèus qu’a percorregut 400 quilomètres en passant per un centenat de comunas, e qu'a mobilizat la societat civila bearnesa. La corsa partiguèt de Bidaishe après l'inauguracion d'una escòla publica, e pertot ont passèt foguèt subrebèlament aculhida per tota la vida sociala e culturala dels parçans. Los organizaires de l'eveniment an encapat un afar primordial de la lucha occitanista, far siá una revendicacion transversala, viva, joiosa e combativa.
 
"La Passem!" es vengut quicòm mai qu'una corsa: una fèsta nacionala de revendicacion. S'agís d'una idèa brilhanta del collectiu Ligams, per revendicar la transmission de la lenga, e sustot, per semenar dins nòstras consciéncias que podèm pas permetre que desaparesca la riquesa pus preciosa qu'ajam, qu'es la que fa de nosautres de ciutadans del Mond en occitan e a la faiçon occitana, e nos permet d'escambiar amb la rèsta de l'umanitat nòstre biais d'èsser, de pensar, de parlar e de viure. Lo nòstre!
 
Amb aqueste editorial, la còla de Jornalet volèm benastrugar los organizaires e los participants de l’eveniment ont esperam de participar activament dins las edicions venentas. En mai d’aquò, volèm acoratjar la rèsta del país d'organizar d'eveniments similars, tanben d'un biais transversal, joiós e viu, e tostemps revendicatiu.
 
Es impossible de salvar un extrèm daissant morir la rèsta del còrs. Cal exportar aquel eveniment en Occitània tota, de Medoc a Menton e d'Aran a Montluçon.