Ieu çò que ne vòli parlar es d’un sistèma inegal, injust, qu'oprimís las gents mai desfavoridas Sofia es una victima al començament, mas refusa d'o èsser perque ela a pas lo privilègi d'èsser una victima

 
 
Ai vist que lo filme a una concepcion fòrça realista. Que t’interèssa de representar? Es la grossesa fòra maridatge o es quicòm mai?
 
Lo filme comença amb lo recit d’una joventa que li dison Sofia, que patís una denegacion de grossesa. La question es qual es lo paire. Amb aquelas premícias comença un thriller social, mas après vint minutas lo filme càmbia un pauc. A partir d’aquí parli mai de çò que m’interèssa vertadièrament, qu'es de far un retrach de la societat marroquina, e mostrar un pauc las fòrças de poder que i a entre las classas socialas. Alavetz òc, lo filme parla de la condicion femenina mas pas solament. Ieu çò que ne vòli parlar es d’un sistèma inegal, injust, qu'oprimís las gents mai desfavoridas.
 
 
Segur, avèm Sofia, una gojata obesissenta que decidís de qualque biais de far partida del sistèma per salvar l’onor de sa familha. Ara, sabi pas s'ela es la marrida o ben una femna emancipada.
 
,De fach, çò qu'explica lo filme, es que totes sèm de victimas e de borrèus a l'encòp, te pòdi pas donar una responsa. Vòli escapar al retrach de la femna aràbia que vesèm totjorn, ont las tractam de victimas…. La realitat es fòrça mai complèxa, Sofia es una victima al començament, mas refusa d'o èsser, en partida, perque ela a pas lo privilègi d'èsser una victima. Mai que salvar l’onor de sa familha, li cal far avançar lo projècte economic de sos parents, e pòt pas permetre que se pèrda a causa d'ela. Ieu, çò que fau aicí es un retrach a partir d’un prisma economic, vòli mostrar que la societat es coma un escaquièr ont totes son un peon e que per pojar dins l'escala sociala lo mond son dispausats a jogar tot çò necessari. Parli de l’ascension sociala, de cossí se jòga aquel jòc e del fach que non i a pas de gents bonas ni de marridas, mas de classas socialas que cèrcan de se manténer o de montar.
 
 
Se vei fòrça influéncia europèa, francesa, sus la distribucion de las classas. Me pòdes explicar cossí fonciona aquò?
 
Fau una critica de la borgesiá marroquina, que se caracteriza per una relacion amb França fòrça estrecha, e aquò es vertat. Seguisson fòrça modèls culturals franceses perque totes los enfants dels borgeses estúdian dins d'escòlas francesas e puèi los adolescents se’n van a França per estudiar dins d'universitats francesas, doncas los dos monds son plan restacats.
 
 
Fòrça inegalitat…
 
Çò qu'es plan determinant, que se vei dins lo filme, es que se pòt saber de quina classa sociala es qualqu'un per son nivèl de francés: del melhor parlan lo francés, del mai rics son, e recipròcament! Alavetz, òc que fau aquela critica de la borgesiá francizada. E la fau a partir del personatge de la cosina, Lena, que comença fòrça ingenua, fòrça generosa, fòrça altruista…  e t'avisas puèi qu'agacha sa cosina amb compassion e gaireben amb condescendéncia. Lena es una personificacion d’aquela consciéncia borgesa e del feminisme blanc, d’aquel feminisme que regarda de naut lo mond que son pas blancs o que son de classas inferioras.
 
 
Que nos contas a prepaus de se maridar sens amor?
 
Lo maridatge en Marròc, tant pels òmes coma per las femnas, es una representacion de la reüssida sociala. Alavetz, i a fòrça nòças, que del mai caras e polidas son, del melhora es l'aparéncia. Vòli que se chifre sus aquò. Evidentament que i a de mond que se maridan per amor en Marròc, mas es çò que ditz la maire de Lena quand li explica que la vida es facha d'engatjaments. Aquò se passa tant en Marròc coma en França. A l'ora d'ara, la borgesiá francesa o fa tanben aquò, de se maridar sens amor, per manténer o alçar sa condicion sociala.
 
 
 
 
Zep Armentano
Entrevista publicada originalament en catalan dins la revista El Cinèfil