La solucien sariá de trobar d’activitats en provençau per lei dròlles amb lei parents per que posquèsson charrar ensems a l’ostau ò per carrieras! Ai una sospresa per la debuta de l’an que ven, totjorn sus Internet

 
 
Ara, l’aventura d’aquesta ràdio es acabada mas i a totjorn Facebook qu’es un bon biais per contunhar de veire ço que se passa dins lo mond occitan e de far passar las informacions.
 
 
Coma èra lo quotidian per vos dins la gestion de la ràdio?
 
Faguèri un trabalh important per recampar un molon de musica occitana, de Gric de Prat en Gironda fins a Nux Vomica ò Jean-Luc Sauvaigo a Niça e tanben dins lei valadas occitanas d’Itàlia (Lou Dalfin, Lou Tapage, Lou Seriol, etc.). En mai d’aquò, metiáu la revirada de chasca cançon en francés e en occitan sus lo sit. L’aviá tanben d’articles sus la lenga e la cultura en generau.
 
 
Aviatz de ressons de la populacion?
 
Pas tant qu’aquò! Dins lo monde occitan e occitanista, lei gents èran contents d’entendre una webràdio en lenga nòstra. Mai en defòra d’aqueu ceucle, aviáu ges d’auditors.
 
 
De leiçons de retenir per l’estrategia d’una ràdio occitana?
 
La promiera caua es de chausir se si fa una ràdio per tota Occitània ò puslèu un malhum de ràdios localas occitanas dins tot lo territòri e que s’ajudan entre elei. Diriáu que la segonda solucien es melhora perque una ràdio locala es mai pròcha dei gents qu’una radiò interregionala.
 
La segonda caua es de faire tant de ràdios ertzianas coma de webràdios per agantar un maxim d’auditors.
 
Mai per faire tot aquò fau recampar de monde! Èri tròp solet per faire quauqua ren mai una chorma ben unida, amb de bòn materiau e una tòca clara pòu faire una ràdio importanta pron lèu dins son canton!
 
 
De qu’es la situacion de l’occitan aüra en cò vòstre, sa visibilitat, sa transmission?
 
Pòdi parlar solament dau Golf de Sant Tropetz. Li a quauqueis associaciens aicí que si bolegan e que fan de charradissas, de cors, de fèstas e de vòtas en provençau. Li  a tanben quauquei professors que donan de cors de lenga dins leis escòlas primàrias.
Mai franc d’aquò li a gaire de visibilitat (solament lei panèus en provençau a l’intrada de quauqueis comunas), li a quasi ges de transmissien dins lei familhas e si parla pas provençau per carrieras. 
 
 
Coma l’occitan seria salvable partent de la situacion actuala?
 
Siáu president d’un bar associatiu dins mon vilatgi monte fasèm un molon d’activitats e viáu que leis activitats monte li a fòrça monde son aquelei que recampan parents e nistons. Alora bensai que la solucien sariá de trobar d’activitats en provençau per lei dròlles amb lei parents per que posquèsson charrar ensems a l’ostau ò per carrieras!
 
 
De que son vòstres projectes (escolars, autres)?
 
Ai una sospresa per la debuta de l’an que ven, totjorn sus Internet. Vos n’en tornarai parlar quand tot sarà lèst!
 
 
 
 
Laurenç Revèst