Mentre que fasiái mos estudis d’occitan, comencèri dins lo meteis periòde a m’entrevar de la vinha amb mon paire Caldriá que los mèdias arrestèsson de picar los païsans en dire que gastan tròp de pesticidas e qu'empoisonan lo mond, mas puslèu que venguèsson constatar la realitat de l'agricultura L’occitan m’a tanben permés de desvolopar un malhum social a l’entorn de la lenga

 

Qual foguèt lo tieu percors escolar e cossí l’occitan i es integrat?
 
Tot mon cursus primari se faguèt a Calandreta, puèi contunhèri l’occitan coma opcion al collègi de Ginhac e a Lodeva pendant mas annadas de licèu. Puèi, faguèri doas annadas de biologia a l’universitat de sciéncias de Montpelhièr e en 2012 me reorientèri en occitan a la facultat Pau Valèri ont reüssiguèri ma licéncia.
 
 
Perqué aver causit lo mestièr de vinhairon?
 
Aviái de predisposicions dins lo mestièr. Mon paire trabalhaba en enologia e se trachava d’una vinha, alara, mentre que fasiái mos estudis d’occitan, comencèri dins lo meteis periòde, en 2012, a m’entrevar de la vinha amb el. Çò que m’agrada es la polivaléncia del mestièr, recampa mai d’una competéncia. Devèm primièr èsser d’obrièrs qualificats tant per los camps coma en mecanica. Mai qu’aquò, cal èsser capable de chifrar a rendabilizar la nòstra produccion e gerir tota la part administrativa del domeni. En brèu, un cap d’entrepresa polivalent.
 
 
Quins conselhs balhariás a un jove que voldriá intrar dins la viticultura?
 
Simplament, se pòdi dire, de gardar lo moral perque s’installar es fòrça malaisit. Pasmens, çò que seriá de plan conselhar serián las formacions prepausadas per VIVÈA (fons per la formacion dels entrepreneires del viu). Son de formacions que dependon de la cambra d’agricultura e que son plan concebudas.
 
 
Que se poiriá melhorar dins lo mestièr per facilitar ton trabalh?
 
Caldriá inversar la vision publica de l’agricultura, que los mèdias arrestèsson de picar los païsans en dire que gastan tròp de pesticidas e qu’empoisonan lo mond, mas puslèu que venguèsson constatar la realitat de l’agricultura.
 
 
Me sentissi concernida per ta competéncia en occitan, sèrvas totjorn un ligam amb la lenga d’òc?
 
Mon paire es un occitanista afogat, doncas soi totjorn al fil dels eveniments, nos arriba de parlar en òc tanben, e puèi, coma fasiái partida de l’associacion d’estudiants d’occitan del MEDÒC, me teni informat de çò que prepausan los estudiants.
 
 
Perqué conselhar la licéncia d’occitan?
 
Cresi que permet de mai conéisser çò qu’es l’occitan, tot simplament, m’a tanben permés de desvolopar un malhum social a l’entorn de la lenga .
 
 
 
Mercegi Romièg Fite d’aver acceptat aquel escambi amb lo risolet. Esperem que sa crida siá ausida!
 
 
 
 
Elodia Raimond