Benevòls coma emplegats, que contunham de trabalhar a distància entà hèr avançar eths nòstes projèctes e sustot que vatz véder que mancam pas d’idèias Qu’ei encara mauavient de poder projectà’s en temps

 
 
Qual es l’impacte del confinament sus las activitats de l’associacion?
 
Que mos a calut anullar totas eras animacions previstas de març a junh: prumèr, era serada que devíam hèr a Bèthhag (Coserans), en partenariat damb era escòla comunala e eth grop Revelhet; après, era 17u edicion deth hestau Passa-Pòrts, qu’èra prevista eths 3 e 4 d’abriu a Montrejau; enfin, eth hestau Total Festum en Comenge-Varossa (8 restitucions e talhèrs esparricats e ua hèsta eth 27 de junh, en partenariat damb era municipalitat d’Arguenòs, ath cap deth Mont Càlem). Qu’ei ua situacion de mauvíver tant peths benevòls e hestaires coma peths artistas e intervenents qu’èran retenguts. Damb eth embarrament a casa, que mos a tanben calut arrestar eras enquèstas etnograficas, que hèm tota era annada entà cuélher era memòria e era lenga au près deths informators qu’an “popat” era cultura gascona. Actualament, sabem pas se quan mos i vam poder tornar.
 
 
Cossí fasètz viure l’associacion en aqueste periòde complicat?
 
Benevòls coma emplegats, que contunham de trabalhar a distància entà hèr avançar eths nòstes projèctes e sustot que vatz véder que mancam pas d’idèias, que demoram presents mès d’ua auta faiçon. Que venguem de lançar un nau DVD, acompanhat d’un libet en color, qu’ei eth portrèt d’ua figura coseranesa plan coneguda, Pierrot de Piulet. Que i parla deras suas tres passions: eths buòus, eras abelhas e eras varietats localas de pomas. Qu’ei disponible per www.oralitatdegasconha.net.
 
Que hèm tanben d’autas arrecèrcas en prevision d’autas publicacions: un libe sus eth solstici d’ivèrn e mès largament de Sent Miquèu dinc aths Arreis. Que trebalham tanben sus un arrepertòri microtoponimic dera comuna de Bèthhag, en tot partir de documents vielhis e deras nòstas enquèstas. Que vam tanben participar a eveniments virtuaus, ua bona faiçon de demorar en contacte damb eras gents. Eth 7 de mai, ara invitacion deth CIRDÒC, que vam participar, damb eth hialat halhaire comengés, a un “etnocafè” au torn dera question: Malhadas e Sent Joan en Gasconha en 2020, o quin víver era hèsta en situacion de pandemia. Entà anar mès lonh encara, a compdar deth 15 de junh, que botaram per Facebook ua conferéncia sus era Sent Joan en Comenge-Varossa, talhucada en 14 vidèos cortets, en gascon, damb sostitolatge en francés.
 
 
Quinas perspectivas entath estiu e era tardor?
 
Qu’ei encara mauavient de poder projectà’s en temps mès que voleríam tornar programar era caminada “Eths camins de Sent Joan deras Vinhas” prevista en març ath torn dera capèra romanica Sent Blancat e que podérem pas hèr pr’amor deth maishant temps... S’era situacion s’adòba, que volem tanben tornar hèr enquèstas etnograficas e arreprénguer eras operacions de restitucion e de difusion au près deras escòlas coma deths abitants entà hèr conéguer aqueth patrimòni immateriau tan preciós. Enfin, que mos calerà tanben començar d’aprestar era 17u edicion deth hestau Passa- Pòrts qu’aurà lòc eths 16 e 17 d’abriu de 2021.