Los gendarmas n’èran pas briga agressius e ne prenoi nada maumiada L’organizacion armada ÈTA qu’a hèit numerós pas entà l’arresolucion deu conflicte militari e que’m semblarí logic que totas las parts en volent la patz seguíssen lo camin de l’ataisada: qu’ei lo principi madeish de la patz. Pr’amor d’aquò, ne pensavi pas estar inquietat per aqueth comentari Totas las informacions collectadas per la gendarmeria (contengut deu Facebook, deu telefonet, papèrs, verbau) que son estadas mandadas tà la procuraira. Ara, que pòt demandar un jutjament o non Qu’estoi troblat peu hèit que l’interrogatòri —d’ua part— ne portè pas majoritàriament suus hèits incriminats e —d’auta part— que portè en partida sus Libertat

 
 
Cossí va ta santat après la detencion?
 
Qu’estó ua purmèra experiéncia inatenduda, mes n’èi pas sofrit nada maumiada. Alavètz la santat que va plan.
 
 
Cossí se passèt la detencion? Quin tractament recebères dels gendarmas?
 
Los gendarmas que tustèn a la pòrta de l’ostau lo 17 de junh de 2020 a 06h30 deu matin. Qu’obrí: sheis gendarmas qu’entrèn e que m’emmanhotèn. Mes après quauques minutas, en véder que n’èri pas violent, que’m las lhevèn. Los gendarmas n’èran pas briga agressius e ne prenoi nada maumiada. Que’m prenón lo telefonet e que devoi dar lo mot de passa. Que podoi vestí’m e hicà’m las lentilhas. Que perquisicionèn l’ostau, mei especificament l’espaci de tribalh on se tròba l’ordenador, papèrs, etc. Que prenón papèrs damb contengut politic e que’us sequestrèn. Qu’ensajèn de descargar lo contengut deu men compte Facebook despuish l’ordenador, mes com èra tròp lent lo descargament, que decidín de’u har despuish deu men telefonet a la gendarmeria, on ne m’emmièn. Acerà, qu’esperèm qu’arribèsse l’avocada, e arron que comencèm l’interrogatòri. Qu’avoi dret a moments entà anar taus comuns, minjar, fumar e que’m perpausèn cafè. L’audicion que durè dinc a 18h00 deu ser, quan me deishèn anar damb la carta SIM, pr’amor qu’avèvan besonh de gardar lo telefonet entà acabar lo lor tribalh informatic. Que podoi tornar tà la gendarmeria l’endedia entà’u arrecuperar.
 
 
La procuraira Cécile Gensac ditz que sès acusat per “de prepauses que tendon a promòure una accion qu’es estada qualificada de terrorista” en ligam amb l’organizacion ÈTA. Perqué?
 
Lo 28 de heurèr de 2020, que comentèi ua publicacion deu Facebook d’ua organizacion antifascista basca. La publicacion que concerniva la non-remesa en libertat deu presonèr politic basco Ibon Fernández Iradi, malaut d’una escleròsi en placas e detengut despuish 17 ans a la preson de Lanamesa. Lo men comentari qu’èra lo seguent: “Ils ne veulent pas la paix. Si on veut la liberté, il faudra la leur arracher. Heureusement que des gudari tels que Ibon ont été là pour montrer la seule voie. Courage à sa famille, ses amis, qui sont victimes de la double peine. Courage aussi au Mouvement pour l’Amnistie et contre la Répression pour sa lutte qui est juste. Occitàniatik.” Aquò qu’estó considerat com ua apologia deu terrorisme. Mes —com èi dit au verbau— que cau distinguir l’intencion, lo perpaus e las comprenesons que se’n pòden har. Per aqueth comentari, n’èi pas avut nada intencion de promòver o d’encoratjar la comesa d’actes terroristas. L’organizacion armada ÈTA qu’a hèit numerós pas entà l’arresolucion deu conflicte militar e que’m semblarí logic que totas las parts en volent la patz seguíssen lo camin de l’ataisada: qu’ei lo principi madeish de la patz. Pr’amor d’aquò, ne pensavi pas estar inquietat per aqueth comentari.
 
 
Que te pòt arribar ara? I aurà un jutjament? Riscas una pena?
 
Totas las informacions collectadas per la gendarmeria (contengut deu Facebook, deu telefonet, papèrs, verbau) que son estadas mandadas tà la procuraira. Ara, que pòt demandar un jutjament o non. L’apologia deu terrorisme que pòt estar condemnada per l’estat francés damb dinc a 7 ans de preson.
 
 
Creses que se servisson del terrorisme per criminalizar l’occitanisme revolucionari o quin autre movement social que siá?
 
Tot çò que pòdi díser sus aquò qu’ei qu’estoi troblat peu hèit que l’interrogatòri —d’ua part— ne portè pas majoritàriament suus hèits incriminats e —d’auta part— que portè en partida sus Libertat. N’incrimini pas arrés: aquò qu’ei devut au sistèma judiciari francés. L’organizacion que publicarà un comunicat au quau n’èi pas volut participar, pr’amor que la defensa ei en cors.
 
 
I aurà un comitat de sosten? Cossí i podèm ajudar?
 
Per ara, la companha, la mair, los mens camaradas e amics·gas que m’an portat lo lor sosteng. Quauques uns·uas que s’amassèn davant la gendarmeria au mieidia, quan èri detengut. Si i a un jutjament dilhèu Libertat que harà ua crida entau sosteng.