Çò mai bèl del servidor es lo fach que la lenga occitana i siá normalizada, e que las gents pòdon veire una espècia de pichona Occitània ont se parla la lenga d’òc Es mai que mai un luòc ont las gents s’ajudan en occitan, e s’ajudan per trobar de ressorsas en occitan Çò mai important qu’avèm vist, ça que la, es lo partatge e l’union del pòble occitan sul servidor, d’occitans del Mond entièr Pensi que la creacion d’un servidor occitan ajuda a la normalizacion de la lenga Es possible que l’occitan aja un avenir, mas avèm de contunhar la lucha per nòstra lenga que non serà pas gaire aisida Son desvolopament ara depend de la mòrt d’aquela canha qu’an tròp de personas d’Occitània, amb lo famós “servís a pas res l’occitan”

 

Un servidor, luec de discussion en occitan, coma e perqué?
 
L’idèa d’un servidor occitanofòn m’es venguda quora intrèri dins la comunautat occitana. Aviái vist que se podiá veire, ausir, e legir la lenga nòstra mas èra gaireben impossible de la parlar pr’amor que non existissiá pas de forums ni de sits dedicats a la comunicacion entre occitanofòns. Aprèp de meses sul servidor d’un amic mieu, conegut amb lo nom de Caçolet (que teniá un servidor personal, mas amb de causas ligadas amb l’occitan), e sus un servidor de lengas minoritàrias administrat per un gascon, decidiguèri de començar un servidor entièrament dedicat a la lenga d’òc, ont las gents de pertot dins lo Mond poirián venir per i parlar occitan, o almens conversar sus l’occitan e sa cultura o son istòria. Aviái amassat d’amics mieus, occitanofòns e non, per venir partejar de causas occitanas qu’avián (musica, ressorsas, sits, literatura...). Çò mai bèl del servidor es lo fach que la lenga occitana i siá normalizada, e que las gents pòdon veire una espècia de pichona Occitània ont se parla la lenga d’òc.
 
 
Cu son los participants?
 
Las gents que venon sus Nòstre País son gents occitanas (occitanofònas o non) e estrangièras (encara un còp, occitanofòns o non) que s’interèssan a la cultura o a la lenga d’Occitània. Plan de personas venon pausar de questions sus la lenga, e encara mai venon sonque per curiositat, per veire una lenga minoritària parlada. Es tanben un luòc de projèctes, plan de personas fan de projèctes ligats amb l’occitan, que siá sus Wikipèdia, de traduccions, o encara de moduls de jòcs vidèo. Es mai que mai un luòc ont las gents s’ajudan en occitan, e s’ajudan per trobar de ressorsas en occitan.
 
 
E la gestion de tot aquel monde?
 
L’administracion del servidor pòt èsser aisida o malaisida, d’unes de nòstres sòcis son administrators amb ieu per gerir lo servidor quora i soi pas. Onèstament, la comunautat ja es fòrça simpatica, alavetz non me cal pas jamai utilizar mon autoritat d’administrator, nonmàs per arrestar las batèstas e quicòm aital.
 
 
D’evolucions?
 
Lo servidor a evoluit positivament despuèi sa creacion, ara onèstament i a mai de gents qu’i parlan occitan, es ara mai una lenga mai dominanta sul servidor. Abans, aviam plan de problèmas amb la politica de nòstres sòcis, es a dire que fòrça personas s’acipavan per de diferéncias politicas, mas ara cresi ben qu’avèm vencut aqueles problèmas. Ça que la, lo servidor contunha d’evoluir amb de nòus projèctes (lo Twitter d’un sòci nòstre, lo servidor Minecraft occitanofòn que per ara es inactiu, las demandas a Duolingo de nos daissar ajustar un cors d’occitan, etc.).
 
Despuèi la creacion del servidor, avèm vist d’unes dels nòstres far de projèctes personals, coma de traduccions de ficcions o encara los vidèos lingüistics d’un sòci catalan occitanofòn nòstre. Çò mai important qu’avèm vist, ça que la, es lo partatge e l’union del pòble occitan sul servidor, d’occitans del Mond entièr.
 
 
De retorns?
 
Lo sol retorn qu’ai recebut del servidor es l’amistat, la sapiéncia d’autres, e la possibilitat de mostrar la lenga nòstra al Mond entièr. Mai que mai l’objectiu principal del servidor es d’èsser un luòc ont se pòt parlar e aprene l’occitan; en mai d’aquò es un luòc ont pòs parlar amb d’amics occitanofòns o interessats per la lenga d’òc. Es tanben l’endrech perfièch per trobar de causas en occitan, coma la musica, los filmes o vidèos e tot aquò.
 
Lo servidor se fa principalament conéisser sus d’autres servidors, en fasent de publicitat sus d’autres servidors lingüistics (e en escambi, fasèm çò meteis per eles). Existís tanben una publicitat sus Disboard, ont sèm lo sol servidor occitan. Lo servidor tanben se fa conéisser per sos sòcis que partejan lo servidor amb sos amics.
 
 
Son utilitat?
 
Pensi que la creacion d’un servidor occitan ajuda a la normalizacion de la lenga, mai que mai romp aquel imatge de “patés de païsan”. De segur, un servidor Discord non va pas salvar la lenga, mas totun, balha la motivacion a qualques personas de dire “l’occitan es pas un patés vergonhable, eles lo parlan coma sens i pensar, adonc lo vòli aprene”, e almens se pòt practicar amb una comunautat que balharà lo supòrt necessari per perseguir l’aprendissatge.
 
 
La visibilitat de la lenga occitana?
 
Actualament vivi a Malta, adonc degun i coneis pas la lenga nòstra, mas dins mon vilatge natal a Clarmont d’Erau, la situacion de la lenga èra pas gaire bona. I existís una sensacion d’occitanitat, mas fòrça gents an pas jamai aprés la lenga; es a dire que la preséncia e la visibilitat de la lenga existissián, mas l’usatge quotidian èra gaireben inexistent, coma dins plan de vilatjons e vilas occitanas.
 
Aquò depend de nosautres, los occitanofòns, la lenga poiriá viure amb la nòva generacion, amb de causas coma Ràdio País, Mèmes Gascons, Jornalet, Òc Tèle... es possible que l’occitan aja un avenir, mas avèm de contunhar la lucha per nòstra lenga que non serà pas gaire aisida.
 
Soi d’origina estrangièra, adonc ma familha parlèt pas jamai occitan, mas, coma soi de Lengadòc, ai un amor per la lenga nòstra e la cultura occitana d’un còp èra. Ça que la, l’occitan es quicòm qu’utilizi plan dins ma vida per comunicar amb fòrça de mos amics occitanofòns, alavetz per ieu, es pas una lenga mòrta, es plan viva.
 
 
L’avenir?
 
L’occitan seriá salvable amb la possibilitat de far son educacion en occitan, de lo poder realament veire en Occitània, e mai que mai amb la transmission. Cresi, de fach, que vivèm en un bon sègle per la resurreccion de la vitalitat occitana, pr’amor qu’avèm uèi la possibilitat de veire la lenga en linha, e de s’educar amb lo Congrès, o encara de seguir de corses al Collègi d’Occitània. Son desvolopament ara depend de la mòrt d’aquela canha qu’an tròp de personas d’Occitània, amb lo famós “servís a pas res l’occitan”.
 
Actualament, ai de projèctes personals que son pas ligats amb l’occitan e tanben de causas de la vida personala, mas assagi sempre de promòure l’occitan quora pòdi, especialament dins las comunautats lingüisticas. Senon, lo servidor es quicòm que fonciona ben, e per ara, tòca totas sas tòcas.
 
Tot çò que pòdi dire es que la lucha per l’occitan es pas acabada, per ara patís la lenga e patís la comunitat darrièr, mas sèm vertadierament al sègle de l’informacion, e totòm a l’escasença de veire la lenga nòstra, avèm la possibilitat d’èsser pas devesits per frontièras, Òc Tèle auriá pas pogut existir i a 50 ans, tanpauc Jornalet, alavetz gardarem totjorn l’espèr occitan, e gardarem çò qu’es nòstre en mostrant al mond qu’aquí sèm.
 
 
 
 
Laurenç Revèst