L’estat turc nos acusèt de l’atemptat d’Istambol. Diguèrem que nosautres aviam pas res a veire amb aquò. Atacar de civils es pas nòstra politica Sèm inquiets per las consequéncias d’aquela nòva operacion, que menarà a una crisi en totes los aspèctes: politic, economic, de seguretat e d’estabilitat. Turquia es lo país qu’ajuda l’Estat Islamic a tornar. Sos ancians membres vivon liurament dins los airals de Siria ocupats per Turquia. Las operacions contra nòstras regions s’organizan d’aquí estant. Russia a paur de pèrdre las claus de la crisi siriana, e per aquela rason ara cèrca de far lo mediator entre nosautres e lo regim sirian, d’un caire, e entre Turquia e lo regim sirian, d’autre caire. Iran tanpauc fa pas çò que fasiá abans Esperam d'arribar a un acòrdi amb totes e evitar una nòva guèrra. Nòstras gents meritan de viure en patz

 
 
La zòna es bombardada per Turquia. Aquesta operacion serà la darrièra?
 
Aqueste còp, Turquia a cambiat son estrategia radicalament. Bombarda las infrastructuras: d'espitals, de cièjas de gran, de sits de petròli e de centralas electricas. Vòl que las gents demòren sens mejans de viure. La situacion es grèva. L’estat turc a totjorn alestit de plans e d'escampas per atacar la region, aquò es pas nòu. Sos atacs afèctan la region en general e tanplan la guèrra contra l’Estat Islamic. Après lo començament d’aquestes nòus bombardaments, lo 20 de novembre, nosautres (las SDF), quitèrem de cooperar amb la coalicion que combat l’EI. La nòva operacion militara entraïnarà de cambiaments importants. L’estat turc nos acusèt de l’atemptat d’Istambol. Diguèrem que nosautres aviam pas res a veire amb aquò. Atacar de civils es pas nòstra politica. A mai, las SDF avèm pas d’agents actius en Turquia. Erdoğan se’n servís coma una escampa per menaçar Rojava e lo nòrd-èst de Siria en general.
 
 
Quines son los chepics actuals de las SDF?
 
Turquia vòl ocupar mai d'airals, son armada ataca ara amb de biaisses desparièrs: bombarda de civils e d’infrastructuras. Aqueles atacs afectèron en granda part las operacions de desplaçament dins la region. La tòca de l’estat turc es de metre fin a l’estabilitat de la zòna e de la vuejar de sos compausants. Atacan ara d'airals de Kobanê, Manbij e los sits de petròli de Derik. Sèm inquiets per las consequéncias d’aquela nòva operacion, que menarà a una crisi en totes los aspèctes: politic, economic, de seguretat e d’estabilitat.
 
 
Quina menaça representa a l'ora d'ara l’Estat Islamic per Rojava?
 
L’organizacion demòstra qu'es totjorn una granda menaça, o vegèrem en l’atac contra la preson d’As Sina’a en genièr passat, e las operacions fachas per lors parents al camp d’Al Hol, ont i a mai de setanta doas mila familhas de l’Estat Islamic de mai de seissanta nacionalitats. Sos dirigents principals son estats eliminats, mas aquò los a pas afeblits. Quand Turquia comencèt de nos atacar, quitèrem de collaborar amb la coalicion internacionala perque ara nos volèm ocupar de la lucha contra los atacs turcs.
 
 
Avèm vista la repatriacion de qualques ciutadans europèus del campament d’Al Hol.
 
De milièrs de familhas estrangièras e iraquianas son dins aquel camp. Las fòrças de la coalicion quichan qualques govèrns per que ne fagan sortir lors ciutadans, mai que mai après l’atac contra la preson d’As Sina’a. Lo nombre de familhas e d’enfants que son estats repatriats supèra pas lo milièr. Devon èsser jutjats quand arribaràn dins lors païses. Mai d'un an comés de crimes contra de civils. Los qu'i demòran son una granda carga per l’Administracion Autonòma del Nòrd e de l’Èst de Siria e per las nòstras fòrças. Es una granda responsabilitat, non sonque en tèrmes de seguretat.
 
 
Cossí afèctan las menaças turcas lo combat contra l’Estat Islamic?
 
Turquia es lo país qu’ajuda l’Estat Islamic a tornar. Sos ancians membres vivon liurament dins los airals de Siria ocupats per Turquia. Las operacions contra nòstras regions s’organizan d’aquí estant. L’operacion militara turca seguenta lor donarà plan mai. Turquia ataquèt près del campament d’Al Hol fa qualques jorns, uèch dels nòstres moriguèron a un ponch de contraròtle del camp.
 
 
Cossí vesètz l’avenir de la region a l’ora d’ara?
 
Vesèm çò que se passa dins lo Mond, que ne fasèm partida. Darrièrament, la guèrra d’Ucraïna a eclipsat la situacion. Siria ne fa partida, d’aquela guèrra. Turquia aprofiècha la preocupacion del Mond per aquel conflicte, compte tengut del fach qu’agís per sos interèsses e aprofiècha totas las oportunitats per refortir sas ambicions colonialas. Russia ara se concentra per obténer la victòria sus Ucraïna, e aquò a afectat negativament son ròtle dins nòstra region. En Iraq e Siria, los dos govèrns son flacs. Lo nòu govèrn iraquian a pas encara demostrat son eficacitat e lo govèrn de Damasc a un ròtle marginal, compte tengut del fach que contraròtla sonque d'airals pichons. Aquesta situacion pauc clara nos afècta fòrça.
 
 
L'invasion d’Ucraïna per Russia e las protèstas en Iran an afectat lo ròtle d’aqueles dos païses dins la region?
 
Òc. An ara d’autras prioritats. Russia a paur de pèrdre las claus de la crisi siriana, e per aquela rason ara cèrca de far lo mediator entre nosautres e lo regim sirian, d’un caire, e entre Turquia e lo regim sirian, d’autre caire. Iran tanpauc fa pas çò que fasiá abans.
 
 
Quinas mesuras prendràn las SDF per la nòva operacion militara turca?
 
Aquí lo mond contunham de viure las orrors de la guèrra. Nòstre pòble reafirma son refús del desplaçament e de la guèrra, aqueste es son messatge, e aquò es çò que nos en fa venir mai responsables coma fòrça militara. Defendèm e protegissèm la region e sas gents dels atacs turcs. Sèm prèstes e nos preparam tecnologicament e moralament. I a d’ofèrtas e de negociacions per evitar una nòva escalada. Las convèrsas contunhan. Esperam d'arribar a un acòrdi amb totes e evitar una nòva guèrra. Nòstras gents meritan de viure en patz.
 
 
 
 
Amina Hussein
Font: Vilaweb