Ei fòrça diferent d’escríuer en aranés, qu’en castelhan Hèr arribar era lengua a naues generacions ei mantier-la viua Calerie méter ara posita des artistes mès mejans, investir mès en art Decidírem amassar-mos entà aportar eth nòste graet de sable ara cultura e tornar-li tot çò que mos auie dat Aciu i a rap, grafiti, beatbox, DJ e un shinhau de bboying! Premanim un hestivau de musica en iuèrn, a on aurà cabuda tot tipe de musica!

L’hip hop es un movement artistic que nasquèt al quartièr sud del Bronx nòvayorkés. Se basa sus quatre aspèctes culturals: lo cant mai conegut coma rap (rapping o MCing), lo ditjeiisme (DJing o turntablism), la dança (breakdancing o bboying) e lo grafiti. Mas tanben se manifèsta dins lo beatboxing (la tecnica d’imitar la musica amb la boca), l’activisme politic e lo dessenh de vestiments o de complements.
 
L’union de dos d’aquestes elements, lo Master of Ceremony (MC) e lo ditgèi (DJ), forman l’estil musical de l’hip hop. Lo rap consistís a cantar o parlar de paraulas rimadas, acompanhadas d’un ritme repetitiu e sincopat, que normalament parlan de la vida per carrièras, de critica sociala o d’eles meteisses.
 
L’hip hop arriba a la Val d’Aran de la man de la còla SHHNHC (Sin Hip Hop No Hay Crew), e lo rap lai sona per lo primièr còp en lenga nòstra amb Crazy Álvarez, escais de Tònho Barrau, que l’11 d’octòbre que ven ofrirà a Vielha lo primièr concèrt de rap en aranés, en un espectacle entitolat Expression Verbau. Nos en parla el meteis.
 

Donques se tracte d’Expression Verbau, probablements eth prumèr concèrt de rap en aranés, aurà lòc er 11 d'octobre que ven entàs 19h00 ena Sala Audiovisuau de Vielha, era entrada ei gratuita! Seràn 45 menutes de concèrt de rap en estat pur!
 
 
Es çò meteis far de rap en aranés qu’en d’autras lengas?
 
Non, ei totauments diferent. Pensi qu’era lengua ei eth veïcul entà transméter çò que vòs escríuer, er aranés ei ua lengua fòrça complèxa, pr’amor des sues influéncies de d’autes lengües, eth resultat ei fòrça diferent ara ora d’escríuer en aranés, que per exemple en castelhan.
 
 
Cal far de rap en aranés?
 
Segur! Pensi qu’ei ua manèra de potenciar era lengua, de hèr-la arribar a naues generacions, fin finau de mantier-la viua.
 
 
Creses que la creacion musicala en aranés, e en occitan en general, es limitada? Que caldriá far?
 
Òc que semble limitada. Pensi que calerie méter ara posita des artistes mès mejans, investir mès en art, fin finau era musica definís ua importanta part dera cultura e dera identitat d’un país
 
 
Cossí arribèt l’hip hop en Aran?
 
Nosati le coneishem gràcies ath boca a boca, as cassetes que passauen de man en man, enquia que, per amor ara cultura, decidírem amassar-mos entà aportar eth nòste graet de sable ara cultura e tornar-li tot çò que mos auie dat.
 
 
De tot lo movement artistic hip hop, quals aspèctes fasètz en Aran?
 
Aciu i a rap, grafiti, beatbox, DJ e un shinhau de bboying!
 
 
Quantes sètz a far d’hip hop? Que fasètz amassa?
 
Donques laguens deth grup èm entorn as 12, mès cada viatge i a mès gent en Aran que participen ena cultura! E amassa ara premanim ua maqueta de rap, ath delà d’un projècte de hestivau de musica en iuèrn, a on aurà cabuda tot tipe de musica!
 
 
E que fa Crazy Álvarez en solitari?
 
Ath delà d’Expression Verbau, tanben premanisqui ua maqueta qu’aurà cançons majoritàriaments en castelhan, damb era ajuda de Nedson Pires, e un aute petit trebalh que veirà era lum pendent er an que ven!
 
 
Quala es l’origina del nom de Crazy Álvarez?
 
Coma toti es subrenòms, me le comencèc a díder un amic, e damb eth temps cada viatge mès gent der entorn se referie a jo atau, enquia que fin finau adoptè eth nòm, o eth nòm m’adoptèc a jo (rire).
 
 
Qualas influéncies as?
 
Laguens deth rap espanhòl è creishut damb Kase o, Nach, Falsalarma, 7notas... tanben m’a influenciat fòrça eth rap estatsunidenc, autant coma eth francés, era musica reggae e sustot era gent deth mèn entorn que se dedique ara musica!
 
 
Qualque afiliacion politica?
 
Pas massa, non i a cap de partit que me represente ena sua totalitat.
 
 
Aviás ja presentat una cançon en aranés fa de temps, e tanben lo clip Esperança. Podèm parlar de qualque edicion discografica?
 
A nivèu profesionau non, mès a niveu casolan auem fòrça projèctes entre mans!
 
 
Trabalhas en qualque causa nòva?
 
A començament d’an demoram treir ua maqueta damb Sin Hip Hop No Hay Crew, ena qu’auem metut moltes ganes e illusion! E tanben era mia maqueta en solitari, ath delà d’ua maqueta damb Ak-kaos, damb eth formam eth grop DandoAsco, aguesta darrèra encara non a data!
 
 
Podètz escotar qualques aires de Crazy Álvarez sul sieu Soundcloud.