Eth vidèo Esperança arribèc a auer mès de 9000 visites Arrecebí fòrça sostens d’Occitània que m’ajudèren a hèr d’auti concèrts Normauments enregistraram un album ena tardor de 2014 Era explicacion ei de cercar ena petitesa dera Val d’Aran. Ei tot

Nicolau Rei Bèthvéder entrevistèt Alidé Sans a la fin d’un concèrt fach a Tolosa lo 26 de novembre, amb Murièl Batbie-Castell e Enric Hernàez. Alidé a 20 ans e compausa, escriu e interprèta sas cançons totjorn en occitan aranés. Retorn sus un an de cançons amb ela.

 
Hè un an Alidé Sans non existie, ara ei pro coneguda ena cançon occitana. Quin explicar açò?
 
Hè un an, si qu’existia. Passe qu’encara non auia decidit de començar es concèrts ath public. Quan comencè a cantar ère damb eth vidèo Esperança. Arribèc a fòrça gent. Eth vidèo arribèc a auer mès de 9000 visites. E dempús d’auer realizat aquerò, coneishí ara gent de BarnaSants. Damb eri e era inauguracion deth hestenau en Vielha en gèr de 2013. Ath madeish temps, arrecebí fòrça sostens dera part d’Occitània de gent que m’ajudèren a hèr d’auti concèrts.
 
 
Non as paur que totòm desbrembe a Alidé Sans rapidament?
 
En aguesti moments, sagi d’eliminar totes es paurs ena mia vida. Non voi paur ath mèn costat!
 
 
Perqué non i a un album d’Alidé Sans?
 
Perque encara non è auut ni temps, ni sòs.
 
 
As d’auti projèctes previsti?
 
Òc, un album! I a donques un projècte. Seguraments ac harè ena tardor de 2014. Normauments enregistraram un album.
 
 
Te sentes aranesa, espanhòla, catalana o occitana?
 
Ei ua qüestion a on semblarè èster un shinhau diplomatica. Mès, me senti de tot. Me senti deth Mond, mès canti en occitan. Sò deth Mond, mès ne sò en occitan.
 
 
Ei aisit d’èster joena e de cantar tostemp en occitan aranés?
 
Perqué non?
 
 
Quin explicar qu’ès era soleta artista aranesa que s’expòrte en dehòra d’Aran?
 
I a artistes aranesi que s’expòrten en dehòra dera Val d’Aran. Mès Aran ei un petit país. Era explicacion ei de cercar ena petitesa dera Val d’Aran. Ei tot.
 
 
En qué eth public occitan ei diferent deth public catalan?
 
Non è pro d’experiéncies entà díder se i a diferéncies o non. Me cau temps entad aquerò.
 
 
Hès collaboracions damb artistes occitans?
 
Òc, collabòri damb Crazy Álvarez, qu’ei un joen rapaire aranés. Recentaments, hec un espectacle tot en occitan entitolat Expression Verbau a on i participè. Collaborè, en BarnaSants, damb Muriel Batbie-Castell.
Tanben, cantè damb Eric Fraj en licèu dera Isla de Baish. Son experiéncies bones e de tornar a hèr.