entrevista
"Soi aquiu entà cantar la ràbia mea cap a cèrtes subjèctes de la vita, tanben entà transméter ideas"
cantaire de Gojats of Hédas
N'i a pas pro de grops radicaus en Occitània, qui parlen deu país noste Que volem díser a l'Estat francés que ne volem pas mei d'eth Qu'èm occitans mes qu'èm tanben militants, aquò n'ac cau pas desbrembar La situacion occitana qu'ei mau coneguda e qu'ensajam de l'explicar dab la nosta musica París que'ns a mestrejat, adara la joenessa occitana qu'a de cridar: Hartèra! Ne podem pas qu'estar respectuós d'aqueths òmis e d'aqueras hemnas qui e's sacrifiquèn entau lor país, que sian irlandés, bascos, còrses...
En genièr de 2010, los blogaires araneses d'un blòg sonat "Lo País" entrevistèron David Ragòt, cantaire de Gojats of Hédas, una banda bearnesa de street-punk. Amb la permission dels autors, e de l'entrevistat, avèm lo plaser de la publicar sus Jornalet.
Aué, entà cambiar un shinhau, vos presenti ua entrevista hèta ath grop de musics Gojats of Hédas, son uns joeni de Pau. Era entrevista ei a David Ragòt, eth cantant d'aguest grop. Adiu David. Va plan?
Escota, va plan l'amic, urós de poder respóner a las toas questions.
Tu ès eth cantant deth grop musicau Gojats of Hédas. Que mos pòs dider sus aguest grop? Que vò dider Gojats of Hédas?
Ben Gojats of Hédas que significa “Les Mecs du Hédas” en francés, lo Hedars qu'ei un quartièr de Pau qui arcuélh la Tor deu Borrèu, un estanquet occitanista e revolucionari, e tanben locau de Libertat. Qu'ei aquiu qu'èm tota setmana a lutar, escambiar, e tanben hestejar.
Quan se formèc? A on? Per qué?
Lo grop que s'ei format en març de 2009 a Pau. Qu'ei en seguir d'un concèrt de Varlin, Generation Spasfon et De la Cruz per davant la Tor qui s'acabè dab l'intervencion violenta de la policia qu'avem decidit de crear un grop, com ua responsa a d'aquera ataca. Atau qu'i poderè parlar d'aqueth quartier e de la nosta luta de cada dia, aquí en Occitania.
Qui compause eth vòste grop?
Que i a 4 gaujós gojats en lo grop: Clément e Bastien a la guitarra, Guigui a la guitarra baisha, e jo entà la canta. Pas nada bateria puish a qu'utilizam ua caisha de ritmes.
Quin estil musicau practicatz?
Ben, vam díser que hèm de punk. Vedi pas çò que poish adobar. Qu'ei tot simplament l'estile de musica qu'escotam mei. Per jo tròbi que n'i a pas pro de grops radicaus en Occitània, qui parlan deu país noste. Atau la causida de har de punk e de cantar en òc qu'estó ua evidéncia per nosauts.
Quines son es influéncies qu'a agut Gojats?
Purmèr que cau díser que tots qu'avem avut d'autes formacions musicaus abans los Gojats. Atau que segueishem la dralha de çò qui s'ei jà hèit a Pau. Mantuns amics a l'entorn de nosauts qu'an format grops deus bons qui ns'an portat quauquarren, que sia monde vienguts deu mitan punk, hardcore, Oi! o quitament hip-hop.
Que represente entà tu Gojats?
L'enveja de crear un grop qui l'estile musicau ei pauc o pas representat en la musica occitana de uei. Que hè hrèita a la joenessa occitana de's bolegar, e se podem ajudar-la au truvèrs de las nostas cançons e deus nostes tèxtes, tant de bon! Que volem díser a l'Estat francés que ne volem pas mei d'eth.
Perqué cantes damb era cara amagada per un passamontanhes?
E perqué pas? Aquò que hè partida de las mea experiéncia musicau. Que portavi la cagola tanben dans mon ancian grop. Que hè mei radicau, e soi pas aquiu per m'amuishar, soi aquiu entà cantar la ràbia mea cap a cèrtes subjèctes de la vita, tanben entà transméter ideas.
Quin objectiu o quina finalitat a eth grop? Quina ei era ideologia deth grop?
Se parlas deu pretzhèit deu grop, qu'ei de tocar mei possible de pertot, pas sonque en Occitània, mei longtemps que possible segur.
Se parlas d'Occitània, qu'ac gausam afirmar: qu'èm independentistas. Que volem bastir ua Occitania antifascista, anticapitalista. N'ei pas la pena de tornar crear çò que coneishem uei en França. Qu'èm occitans mes qu'èm tanben militants, aquò n'ac cau pas desbrembar.
De qué parlen es vòstes cançons?
Las cançons nostas que parlan segur deu Hedars, d'Occitània, deu combat noste contra las joenessas identitàrias d'Occitània e d'alhors, deu noste combat entaus presoèrs politics qui ua cançon entà Yvan colonna. Tanben contra la politica deu Sarko e d'autas causas.
En quines lengües cantatz?
Francés e occitan peu moment.
Quin ei eth vòste compromís damb Occitània?
Que soi sòci de Libertat, los autes que son simpatisants. Qu'ensajam d'estar presents a tots los grans eveniments qui pertòcan Occitania: l'Estivada de Rodés, Hestiv'òc, las hèstas de Calandreta, las manifestacions entà la lenga ... Per cada concèrt dehòra Occitània que disem d'on vienem e quau ei la nosta luta. La situacion occitana qu'ei mau coneguda e atau qu'ensajam de l'explicar com ac podem har dab la nosta musica.
Quina ei era tua vision sus eth futur d’Occitània? E dera sua joenessa?
Qu'ei sus la joenessa que's basteish l'aviéner, com ac ditz lo Louis de l'Arcusgi. Atau qu'esperam que's bolegarà per Occitania, de faiçon politica e pas sonque culturau. N'avem pas arren contra las danças e las cantas tradicionaus, que las cau transméter aquò segur. Mes a un moment dat, que's cau tanben demandar çò que volem entau noste pòble! Arrestam de véder lo país e la lenga denegats per aqueths jacobins, per l'Estat francés. Que cau lutar tot dia, baishar per carrèra e exigir l'oficialitat de la lenga, e lo “víver e dicidir au país”. Qu'ei dab aquera joenessa qu'Occitània serà reconeguda com ac deveré estar despuish ua pausa. París que'ns a mestrejat peu passat, adara la joenessa occitana qu'a de cridar: Hartèra!
Que ne penses tu sus era situacion des nacions sense estat com Irlanda deth nòrd, Occitània, Euskadi...?
Totas que son diferentas istoricament. Ne's pòt pas comparar las situacions basca e occitana. Los camarades bascos, còrses o catalans per exemple qu'an annadas d'avança que sia au nivèu de la lenga o de la luta. Que ns'en devem inspirar mes shens jamèi desbrembar las especificitats nostas. Segur la solidaritat enter tots qu'a de seguir.
Per çò qui pertòca Irlanda deu Nòrd, qu'ei l'exemple qui amuisha que la luta entà la reconeishença deus pòbles n'ei pas aisida. Que i avó hòrt de morts, ne'us cau pas desbrembar en esperar que n'iaurà lo mensh possible a l'aviéner. Ne podem pas qu'estar respectuós d'aqueths òmis e d'aqueras hemnas qui e's sacrifiquèn entau lor país, que sian irlandés, bascos, còrses...
Quauquarren mès a díder?
Mercés hèra a vosauts! En esperar qu'un dia auram lo parat de tocar au ras de vòste. Visca la Vath d'Aran antifascista! Visca Occitània!
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#11 D'acòrd, que compreni.
#10 Es pas per la cagola mas pel fach d'escandalizar, v'aquí la basa de l'estetica punk.
Una banda punk catalana, The Fuck, fa qualques ans, sortiguèron al concèrt abilhats coma nazis en fasent de salutacions romanas e en cridant de lèmas fascistas. Apuèi, se tirèron los vestits e joguèron a pel. Lor calguèt pagar una amanda per ensenhar lo sèxe, mas pas una liura de punicion per far lo fascista. Es aquò çò que volián denonçar.
#9 Portar ua cagola e hè partida de l'estetica punk ? As d'audes exemples ?
#8 Dins aquel cas pensi que s'agís de mesa en scèna, e fa partida de l'estetica punk. Los gojats fan la siá contribucion a la normalitat de la produccion occitana. Cal produsir de tot en occitan.
#7
Quan hen una entrevista a punt de vista en France 3 enmascarats atau com militants de l'ETA, aquò n'es pas una bona causa e es un acta pèc! Mercei a aqueths luserps, la gent a maishanta vision deus occitans...Aimi lo punk rock mès pas quan ne pensa pas la soa paraula artistica de cap au monde!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari