Nos caliá arribar a la societat, jónher lo movement anticapitalista solidari internacionau e combatre l’idèa que l’antifaissisme son aquelei que se pelejan amb lei fachos S’encuei l’ultradrecha se presenta coma anticapitalista, es pas per defendre l’esplechat davant lo patron, mas amb la tòca que leis entrepresas nacionalas amolonen lo capital e sostengan la nacion A sabut utilizar internet per se metre dins la tèsta dau vesin e a aprofechat tanben lei reaccions contràrias Lo cònse Stéphane Ravier, dau Frònt Nacionau, es un òme que parla ben, es pertot e sap donar un imatge moderat de se meteis, e mai se fa sièis o sèt ans lançava de cadieras ais immigrants

 
Que provoquèt l’aparicion de Nosotros, eretièr del collectiu Accion Antifaissista Marselha?
 
Lo primièr chòc foguèt l’assassinat dau jove antifaissista Clément Méric, mòrt ai mans d’un neonazi de Troisième Voie en junh de 2013. La segonda rason foguèt lo tractament mediatic de la question. Nos aviseriam qu’eriam embarrats dins lo quartier e que lei gents nos vesián coma una faccion politica e o siam pas. Comprenèm que l’antifaissisme li cau luchar contra tota mena de dominacion, doncas que s’inscriu dins l’anticapitalisme e lei luchas popularas.
 
 
Caliá cambiar d’estrategia?
 
Nos caliá arribar a la societat, jónher lo movement anticapitalista solidari internacionau e combatre l’idèa que l’antifaissisme son aquelei que se pelejan amb lei fachos. Amb Nosotros, avèm impulsat de programas de sosten administratiu, escolar e d’acompanhament ai personas vielhas, çò que nos a permés de se sarrar de nòus sectors sociaus.
 
 
Acta Non Verba a l’intencion d’explicar aquela evolucion?
 
L’idèa dau documentari es d'explicar que siam pas un ret barrat e que, se volèm cambiar la societat, nos cau partir de sa realitat.
 
 
Dins lo documentari, i apareisson de seguidors del Sant Pauli, lo club de fotbòl antifaissista d’Amborg. Los antifaissistas lor cal tanben donar l’exemple dins los estadis?
 
Sovent, la senèstra ditz que, s’argumentam plan, tota la societat serà de nòstre costat, mas, après, veses que i a 30 000 racistas e maclistas dins lei terrens de fotbòl. A ieu m’agrada pas lo fotbòl, mas ai de camaradas antifaissistas que i van e tròbi normau de chifrar sus aqueu coma quin autre fenomèn que siga. Çò important es d’i èsser presents. Tanben dins la lucha dau pòble curd, e per aquela rason avèm creat un grop de sosten.
 
 
Quina opinion n’as?
 
Justament, aqueste estiu i anarem filmar lo documentari seguent. Es una populacion qu’a causit lo feminisme e l’autogestion; evidentament, es pas perfiecha, mas nos cau èsser solidaris e bastir ensems; per aquela rason emplegue pas d’expressions coma “donar l’exemple” ò “ajudar”, mai au contrari: “anar a descubrir l’autre” e “bastir”.
 
 
Fins a quin ponch la crisi a contribuit a l’ascension de l’ultradrecha en França?
 
I a contribuit, mas es justament per aquò que la senèstra deu explicar que, per cambiar la societat, cau d’alternativas. E tanben que, s’encuei l’ultradrecha se presenta coma anticapitalista, es pas per defendre l’esplechat davant lo patron, mas amb la tòca que leis entrepresas nacionalas amolonen lo capital e sostengan la nacion. Es aquò çò que nos cau combatre.
 
 
Cossí s’es transformada Marselha a respècte dels ans 1980?
 
I a un desèrt entre lei doas. Dins leis ans ochanta, i aviá l’esperança perque lei socialistas èran arribats au poder per lo primier còp. Mai leis antifaissistas de l’epòca avertiguèron ja que trairián la societat. E es estat coma aquò: la senèstra es venguda estatica e a permés que la vila siga arrestada en çò que tanh a lei dinamicas sindicalas ò d’autras sòrtas.
 
 
Lo succès del Front Nacional a una relacion amb aquela desmobilizacion?
 
A sabut utilizar internet per se metre dins la tèsta dau vesin e a aprofechat tanben lei reaccions contràrias. Fruch d’aquò, encuei, totei lei partits parlan de seguretat, d'immigracion e d’autrei tèmas que son lo programa dau Frònt Nacionau, en luòga de parlar dau sistèma sociau, deis inegalitats o dau despartiment de la riquesa. Poiriam dire que lo Frònt Nacionau es pas per carrieras, mai si qu'es dins la tèsta de totei, que cada jorn intègra aqueu imatge polit ò adocit qu’ofrís.
 
 
Còsta de comprene aquela acceptacion, creses pas?
 
Nosautres la comprenèm: lo Partit Socialista s’interèssa pas a la populacion e, per còntra, lo cònse Stéphane Ravier, dau Frònt Nacionau, es un òme que parla ben, es pertot e sap donar un imatge moderat de se meteis, e mai se fa sièis o sèt ans lançava de cadieras ais immigrants.
 
 
Se sap qual assassinèt Clément Méric?
 
Un nazi qu’èra pas dau Frònt Nacionau, que vòu pas de mond que fagan de conariás en son nom. Lo recrutament fonciona a posteriòri, çò qu’es fòrça intelligent de sa part.
 
 
Que fasèm amb la classa mejana que vòta per los “socialdemocratas”, alavetz?
 
La question es pas estrictament de classa, mai de dubertura o d’exclusion. Se me demandan perqué siáu antifaissista e de senèstra, respondrai qu’o siáu perque siáu dubèrt. Per malastre, dins fòrça cas es l'invèrs: siam barrats e exclusèm, e mai entre nosautres. Es per aquò important d'aver d’espacis ont poscam avançar ensems, atraire de mond que nos comprengan. Es normau que i aga debat e conflicte perque totei siam pas de supermilitants, mai nos cau fugir la citacion que ditz: “Volèm far de grandei causas e, tant que i a pas de grandei causas per far, fasèm ren”.
 
 
 
 
Júlia Bacardit
Entrevista publicada en catalan dins Directa