Qu’assomam, que calculam las causas amassa, dab Calandreta [...] e que disem a Calandreta on vam tribalhar a l’aviéner tà que posquin prevéder un desvolopament sus aqueth territòri Lo noste tribalh normaument qu’ei de lhevar la damanda deus pairs en lo prumèr grad e de la transméter a l’Educacion Nacionau tà balhar còs aus projèctes d’obèrtura de classas bilingüas Lo simbòl qu’ei hòrt: que s’orbí augan la purmèra classa bilingüa publica de l’aglomeracion de Bordèu, au Boscat Los Pirenèus Atlantics, qu’ei lo departament dab lo mei gran nombre d’escolans bilingües Ad aquesta rentrada en l’academia de Bordèu, los cinc departaments, qu’i aurà a l’entorn de 1860 mainatges en l’ensenhament bilingüe public. Que vòu díser que n’avem ganhat 1100 en sèt rentradas

 
 
Deu còp, que cau préner en consideracion tanben la preséncia de Calandreta? Que podem imaginar ua reflexion comuna tà causir un endret o un aute?
 
Segur que òc. Aquò, qu’ei lo còr de la nosta reflexion. En oposicion per exemple a çò que s’i passa, e n’èi pas paur d’ac díser, en l’Acadèmia de Montpelhièr. Acerà qu’ei tarrible, mes qu’ei tarrible! Que tribalhan l’un contre l’auta. E nosautes ne’n volem pas enténer a parlar d’aquò. Jo çò qui hèi entaus mainatges deu public, qu’ac herí de la medisha faiçon taus mainatges de l’immersiu associatiu, e qu’ac dísi clarament. Qu’assomam, que calculam las causas amassa, dab Calandreta. Que hèm compte deus endrets d’implantacion, pr’amor, Pau hicat a despart, en los parçans on n’an pas, los calandrons, la possibilitat de continuar au collègi, nosautes, evidentament, que tribalham tà que los mainatges e’s posquin amassar a l’entrar deu collègi. Atau que’ns permet de poder demandar l’ubertura d’ua DNL (disciplina non lingüistica) qui sia ensenhada en occitan. E tad aquò har, que’ns hè hrèita un detzenat de mainatges. Deu còp, que ns’i hèm amassa. E que disem a Calandreta on vam tribalhar a l’aviéner tà que posquin prevéder un desvolopament sus aqueth territòri.
 
 
Qu’èm luenh de l’oposicion a còps evocada...
 
E aquò qu’ei un devís tienut màgerment a l’endehens de l’Educacion Nacionau: que creden a la concurréncia enter las cordèras immersivas Calandreta e lo Public. Qu’ei exactament lo contra!
 
Qu’èi dus exemples en Òlt e Garona: la cordèra bilingüa qu’a adara un trentenat d’ans, a Agen, en ZEP, au bèth miei de la ciutat. Qu’aprenom, cinc ans a que crèi, qu’ua Calandreta s’anava orbir au ras, a un centenat de mètres. Tà nosautes, qu’èra l’assegurança que los mainatges anèssin au medish collègi, que n’èra l’assegurança!
 
A Vilanuèva d’Òlt, la mairetat qu’arrefusè de balhar locaus tà la creacion d’ua Calandreta, donc que’s vienón installar a Pena d’Agenés, au ras de Vilanuèva d’Òlt. Que hè dètz e ueit ans, que crèi, que i a ua cordèra bilingüa a Pena d’Agenés, e qu’èm contents de véder arribar ua Calandreta: pr’amor deu sector deu collègi, que seram dens lo medish, aquò qu’ei segur, e puish que permet taus mainatges, tanben, de’s díser: “Ne soi pas lo sol a apréner en occitan en la mea escòla, que i a estructuras escolaras mei qu’ac perpausan”. E aquò, que tròbi qu’ei positiu.
 
 
Tà çò qui ei de l’opcion occitan au collègi, ei tanben l’ahar d’ÒC-BI?
 
Ne’n deuré pas estar briga! Lo noste tribalh normaument qu’ei de lhevar la damanda deus pairs en lo prumèr grad e de la transméter a l’Educacion Nacionau tà balhar còs aus projèctes d’obèrtura de classas bilingüas. Mes la realitat qu’ei tot auta, e que s’i hèm tanben en lo segond grad tà ensajar de pedaçar! Qu’intervienem tà har vàler la demanda deus pairs. Per exemple, que parlavi de las derogacions qui son obligatòrias adara...Mes los servicis de l’Educacion Nacionau n’ac saben pas enqüèra, pr’amor qu’ei tot navèth. Que pòt estar tanben problèmas d’atribucions de pòsts. N’i èram pas briga, nosautes. Qu’ensajam de tribalhar sus las questions qui trucan, d’alogar las cuentas tà tot lo monde, tà que los mainatges e posquin recéber l’ensenhament en occitan.
 
 
Qu’evoquès en fin d’annada passada ubèrturas possiblas de classas en las Lanas e en Gironda...En podem parlar per de bon adara?
 
Qu’ei ganhat! E ne voi pas har a l’engloriat, mes lo simbòl qu’ei hòrt: que s’orbí augan la purmèra classa bilingüa publica de l’aglomeracion de Bordèu, au Boscat. Qu’ei drin lo Neuilly bordalés, donc lo senhau enviat a la societat bordalesa qu’ei hòrt, e que’n soi hòrt content. Qu’i a de mei la seguida au collègi e au licèu, qu’ei dejà previst, donc qu’ei hèra plan.
 
 
E las Lanas?
 
Qu’ei l’escolan lo mei bon de l’Acadèmia de Bordèu pr’amor en quauques annadas, qu’an ubèrt cinc classas bilingüas adarron, tot an. E tà hestejar aquò, augan, que n’an ubèrt duas a l’encòp! A Tartàs e Magesc. E que tieni a soslinhar quauquarren: la conselhèra pedagogica que hè dab ÒC-BI un tribalh esmiraglant, e que ns’i èm escaduts totun a amassar un trentenat de mainatges e las duas classas, donc que vòu díser la damanda parentau qu’existeish, que sufeish de’us informar com cau e de l’anar cuélher.
 
 
E en Biarn alavetz, nada ubertura augan?
 
Los Pirenèus Atlantics, qu’ei lo departament dab lo mei gran nombre d’escolans bilingües, un drin mensh de la mieitat deus efectius deu bilingüe que son en Biarn e Baish Ador, mes que ns’hè degrèu totun, de véder qu’i avó duas mauescadudas augan, a Anglet e a Lons. En los dus cas, que son lo monde de l’Educacion Nacionau qui an travat lo projècte. En un cas, l’esquipa de l’escòla, en l’aute, l’inspector de circonscripcion deu parçan.
 
 
E podem balhar quauques chifras globaus,  tà’s rénder compte?
 
Las chifras que creishen donc qu’ei un senhau positiu. Ad aquesta rentrada en l’academia de Bordèu, los cinc departaments, qu’i aurà a l’entorn de 1860 mainatges en l’ensenhament bilingüe public. Que vòu díser que n’avem ganhat 1100 en sèt rentradas, donc que’m balha l’espèr.
 
 
Qu’ei çò que podem desirar a ÒC-BI tà’s melhorar enqüèra?
 
Alavetz que va estar lo men còp de gula! Que hesè annadas que demandavi a aver un aute salariat tà tribalhar dab jo en l’Acadèmia de Bordèu, pr’amor que’m la peli solet sus cinc departaments. E l’ÒPLO que decidí de’ns balhar la moneda tà poder arrecrutar un aute salariat, mes que’ns demandè d’envià’u en l’Acadèmia de Tolosa, e que’n soi hèra decebut. Donc tà respóner a la question: desirar un aute salariat tà l’Acadèmia de Bordèu entà viéner tribalhar dab jo e damorà’i!