E quan ei tornat tà Pau, que i avè un messatge suu son telefonet qui disèva: “Qu’èi escotat Boisson Divine, que’n soi ahuecat, que’us vòli entà 2018 en Japon”. Qu’ac diseram, qu’èm gascons, mes qu’ac calerà explicar

 
 
Per Boisson Divine, ua rentrada cargada au sortir de las vrenhas?
 
Que òc! Que vam partir en virada en Japon entà tres datas: trenta minutas de temps tà las duas purmèras, e quaranta tà la tresau. Donc, que vam prénguer set o ueit tròç, e que’us vam tribalhar sonque aqueths, entà har un bon empont.
 
 
Quin s’ei passada aquera apressada dab Japon?
 
Qu’ei gràcias a Pèir, lo noste bohaire! Que jòga dens un aute grop, qui s’apèra Skiltron, un grop de folk metau, e que son anats en Japon l’an passat tà tres concèrts, tanben. Qu’a balhat un CD de Boisson Divine a l’organizaire, dab arren en cap, sonque tà har plaser. E quan ei tornat tà Pau, que i avè un messatge suu son telefonet qui disèva «Qu’èi escotat Boisson Divine, que’n soi ahuecat, que’us vòli entà 2018 en Japon».
 
 
Qu’ei dens un encastre particular?
 
Que òc, un hestau qui s’apèra Pagan Metal Horde, un hestau de musica pagana e metau. Qu’i vam jogar dab dus grans noms deu folk metau modèrne: Ensiferum, qui son de Finlàndia, e Troll Fest, qui son de Norvègia. Qu’i aurà tanben un grop chinés, qui hè metau dab instruments chinés, qu’ei hèra interessant, e italians tanben, qui cantan en anglés e qui’s prénen per èlfes, drin especiau.
 
 
Taus japonés, que va estar exotic d’enténer un grop qui canta en gascon?
 
N’ac sèi pas se, tà un japonés, cantar en francés o en gascon e harà ua grana diferéncia! Qu’ac diseram, qu’èm gascons, mes qu’ac calerà explicar, pr’amor entad eths, n’ei pas ua evidéncia.
 
Totun, Rosina de Pèira qu’anè en Japon trenta ans a, e que i a un cercle occitan deus japonés acerà! Qu’an ua pagina Facebook qui s’apèra “Occitans du Japon". N’ac sèi pas se son japonés afogats de cultura occitana o expatriats, mes que vam prénguer contacte e benlèu que vengueràn entaus véder.
 
 
Avetz en cap aquera “responsabilitat“ de portar la cultura nosta?
 
Non, n’ei pas ua responsabilitat, ne’s cau pas prénguer au seriós. Qu’ei totun ua fiertat d’anar cantar en gascon e d’amuishar la nosta cultura tan luenh.
 
 
E la seguida de l’album Volentat, avetz léser d’i pensar?
 
Tau tresau, las composicions que son acabadas, tà las paraulas que i a un pauc de tribalh enqüèra. Pensi que vam començar d’enregistrar l’annada que veng, au mes de març, e benlèu que sortirà au cap de l’annada, o a la debuta de 2019.
 
 
 
 
Joan-Nadau Commeres