Lo patrimòni explicat als enfants es clarament estat mes en valor per un cèrt nombre d’oficis dau torisme Mas ai pas particularament rescontrat de mesa en valor de la lenga dau país dau temps de las mieunas vesitas Aumens dins la presentacion dels sits sota forma de panèus explicatius o autres… Mens que de traduccions en anglés en totes los cases

Patrick Cavaglieri, quau siatz? 
 
Sio professor d’Istòria-Geografia en disponibilitat, ensenhèro un vintenau d’ans dins de licèus franceses a l’estrangier. Estau ancuei a Veinas dins lo departament dels Auts Aups e ai entrat dins una Cooperativa d’Activitats e d’Emplec per crear de quasèrns de vacanças departamentaus, virats vèrs la descobèrta dau patrimòni.
 
 
De qu’es la gènesi dau projècte? 
 
Trobavo damatge de pas trobar autra chausa, en periòde de vacanças escolaras, que de quasèrns de vacanças “fòra sòu”, proposant ges de possibilitat de reliar çò qu’aprenèm a l’escòla a la descobèrta de son environament geografic e patrimoniau.
 
 
Coma es mes en valor lo patrimòni dins l’èst d’Occitània e en general?  

Aguent viscut los darriers vint ans a l’estrangier, ai lo sentiment que lo patrimòni explicat als enfants (vist qu’es puslèu mon domeni) es clarament estat mes en valor per un cèrt nombre d’oficis dau torisme que prepausan d’activitats ludopedagogicas, de juecs de pistas de descobèrta dau patrimòni de qualitat. Au revenge, lo vesitaire “lambda” que se desplaça un pauc a l’astre serà ben mielhs a seguir un percors patrimoniau amb d’enfants dins un vilatge (per exemple Faiença, Cuers dins lo departament de Var, que prepausan d’itineraris saetats) que dins lo centre de vilas de talha mai granda.
 

 
De resultats, de retorns? 
 
D’encoratjaments sobretot, de libraris tot plen aculhents que tròban l’idèa interessanta e accèptan ben volentiers de vendre aqueus quasèrns. Me chaurà esperar la fin de l’estiu per èstre mai precís sus los retorns. 
 
Dau mieu temps d’escolan, siam pas totjorn estats sensibilizats au patrimòni dich locau, a chambiat? 
 
Sio d’acòrdi amb vos, me sembla que nòstres ensenhaires èran mens encoratjats d’utilizar lo patrimòni locau, mas me pòo enganar. Ancuei, los programas novèus dau primari (2016) meton verament endavant “las traças dau passat dins l’environament de l’enfant”. E incitan doncas los ensenhaires d’utilizar chasque fes qu’es possible un exemple locau per estudiar un periòde d’istòria.
 
 
Una plaça per la lenga dau país, la lenga d’òc=c, l’occitan vivaroaupenc ? 
 

 
Ben de chausas m’an pogut eschapar, quitament s’ai passat tot plen de temps dins lo departament per far aqueus quasèrns, mas ai pas particularament rescontrat de mesa en valor de la lenga dau país dau temps de las mieunas vesitas. 
 
Aumens dins la presentacion dels sits sota forma de panèus explicatius o autres… Mens que de traduccions en anglés en totes los cases.
 
 
Avètz de projèctes per l’avenir? 
 
Se tròbo un public, l’enveia de continuar l’experiéncia amb los departaments vesins, Aups Maritims, Bochas de Ròse, o de la mesma region, coma mon departament aupenc. Serà segurament l’ocasion alora de rescontrar parier d’associacions d’autres departaments, coma foguèt lo cas dins lo departament de Var, amb per exemple lo Ceucle dels Autors Bandoleses.
 
 
 
Laurenç Revèst
 
 
 

---

Referéncia dau primier quasèrn: 
— Quasèrn de descoberta dau patrimòni- especiau departament de Var. Cicle 3 CM1-CM2.