Sus Internet mei que tot, competicions amistosas, cançons, desfís, aperitius virtuaus, vidèos e interaccions de tot ordi que s’espeleishen, tà ensajar d’ahortir los escambis. Qu’ei dens aqueth esperit que Ràdio País e perpausa sus la soa pagina Facebook miniconcèrts “a casa”. Artistas de tot escantilh qu’i vienen entà passar un moment dab lo monde, en interaccion virtuau. Que s’ageish tot simplament d’un dirècte que l’artista e hè dab lo son compte facebook, mes qui serà anonciat e partatjat per la ràdio, entà crear un eveniment vertadèr.
 
Qu’an comencèn dimenge passat dab Primaël Montgauzi, qui cantè miei òra deu son salon enlà, acompanhat per la poetessa siriana Mays-el-Rim Karfoul.
 
Diluns, Baptiste Labenne que seguí dab la presentacion en avantprumèra de “Milharis”, cançon deu navèth album de Boisson Divine La halha.
 
E dimars, qu’ei Michaël Barret (deu Congrès mei que mei ) que cantè au ukulélé cançons en occitan, espanhòu e francés.
 
Dimèrcs, Guillaume Lopez que prenó la seguida a partir de sheis òras deu ser, abans las prestacions anonciadas de la cantadora landesa Coralia Nazabal uei dijaus, puish Joan-Miquèu Espinasse divés, tà un estrèit deu son espectacle “Las cornemusas occitanas peus nuls” e enfin Didier Tousis dissabte a sheis òras deu ser.
 
D’autes artistas que son estats sollicitats tà las setmanas a viéner.
 
Que podetz contactar la ràdio a radiopais@gmail.com si voletz perpausar quauquarren.