Dissabte 19 de febrièr de 2022 s’es debanada l’Amassada Generala de l’Associacion AQUÍ L’ÒC a l’Espaci Occitan Carcinòl (Limargue), ont un vintenat de personas, dont Franck Dumas adjunt a la comuna de Sent Seren cargat de la cultura, an participat amb atencion. Lo contengut detalhat d’aquesta Amassada a sauput interessar lo public qu’a saludat la diversitat de las accions de l’Associacion en favor de la lenga e de la cultura occitanas dins lo nòrd d’Òlt. Lo president, dins son rapòrt moral, a mercejat totes los presents, atal coma totes les aderents, donators, partenaris e mediàs dont Jornalet.
 
La presentacion del compte-rendut d’activitats e del compte de resultats 2021, a fach ressortir lo trabalh dense e regular de l’Associacion puèi un budgèt previsional e los projèctes per 2022 an contentat los participants. Demest aquestes projèctes, se pòt notar lo retorn del Festenal Escambis que se debanarà los 20, 21 e 22 de mai. Totas las datas son de tornar trobar sul site d’AQUÍ L’ÒC: www.espacioccitancarcinol.com atal coma sus son compte Facebook.
 
Enfin, una pichona partida del Conselh d’Administracion renovelada e rejovenida a eligit lo burèu novèl amb un cambiament de secretari d’origina valenciana.