Peth dret de vòt
 
Jo non voi mès
eth sòn mau vent,
eth sòn cèu gris
n’eth sòn peish gròs,
ne pan deth sòn
n’eth sòn gran rei
n’era sua lei,
qu’è set de vin,
non pas de sang.
Voi eth mèn dret
de vòt tà jo,
que deth sòn frau
jo ja n’è pro!
 
 
Oxitònia
 
Bastiram un país nau
damb paraules oxitones,
tà que non mos hèsquen mau
ne damb bombes ne damb hones
 
non credem enes pistòles
ne tanpòc enes gabiòles,
esborrem es epitafis,
desbastim es cenotafis
 
non volem cap mès monarca
qu’eth nòste rei: Sent Pançard,
mo’n trufaram dera Parca
e viueram ar azard
 
aboliram es doctrines,
cremaram es guilhotines,
qu’èm un pòble atalentat
de bistèc e libertat
 
desarmaram as soldats
e lançaram en abisme
toti es ismes impausats,
servituds, colhonialisme
 
entà tornar començar,
damb pro temps tà romançar
e soniar un nau avier
qu’entre toti haram a vier
 
 
 
Xavi Gutiérrez Riu