[extrach de https://www.jornalet.com/10079 ]

A Seborca es un vilatge de Liguria fòrça pròche d’Occitània que se revendica coma principat independent. L’estat italian considèra que l’endrech es pas qu’una comuna transalpenca coma las autras, amb son cònsol màger coma las autras. L’istòria, totun, remonta a 1963 quand Giorgio Carbone organizèt un referendum per contestar l’annexion d’A Seborca per Itàlia. Foguèt un plebiscit, çò rapòrta Nice-Matin. Carbone s’apiejava sul fach d’una error administrativa durant la crompa del principat eclesiastic pel duc de Sardenha. Lo duc paguèt pas la crompa e lo tractat foguèt pas jamai ratificat.
 
Un país amb sa moneda
 
Lo principat d’A Seborca a sa pròpria moneda, lo luigino, en remembre de las monedas fachas al sègle XVII. Aqueste a solament de valor dins la vila ont es emplegat coma moneda locala. Pasmens, lo Luigino a desvelat un interès dins lo Mond del colleccionisme numismatic. La valor donada es fixada a 6 dolars estatsunidencs.
 
A Seborca a tanben sas pròprias immatriculacions automobilas, mas pòdon pas èsser legalament utilizadas qu’al costat de las italianas. A mai, las cartas d’identitat, los passapòrts e d’autres timbres del principat son mai emplegadas per lor valor folclorica e toristica que non pas legala.
 
La Republica Italiana reconeis pas lo principat d’A Seborca e considèra qu’aquel vilatge es de jure e de facto jos jurisdiccion italiana.