S’inaugurèt dimenge passat a Vielha un monument als militars de l’anciana casèrna de la nomenada “Legion Blanca”. Se tracta de la companhiá d’esquiaires e escalaires, una unitat d’elèit de l’armada espanhòla fondada en 1961 e que sa casèrna se trobèt al capluòc aranés entre 1962 e 2000. Lo monument l’inaugurèron a l’ocasion del desen rescontre de l’associacion dels ancians veterans d’aquela anciana casèrna qu’un còp per an s’amassan a Vielha.
 
L’eveniment a tengut lo sosten de la comuna. “Er Ajuntament de Vielha e Mijaran a participat ena Xau Trobada de Veterans Esquiaires Escaladors de Vielha, a on s’a inaugurat ua escultura en aunor a toti aqueri qu’ath long dera sua vida sigueren enes casèrnes militares de Vielha”, çò podiam legir sus la pagina Facebook de la comuna aranesa. Lo cònsol màger, Juan Antonio Serrano (Unitat d’Aran-PSÒE), a profechat de l’eveniment per inaugurar lo monument que representa un soldat amb sos esquís e son fusilh.
 
De son caire, l’èx-deputada aranesa Mireia Boya a publicat un fil sus Twitter ont critica la decision del cònsol de Vielha e deplora sa causida de rendre omenatge a la violéncia militara d’origina franquista sens demandar als araneses se se senton un pòble de patz.
 
D’efièch, la decision de Juan Antonio Serrano arriba dos jorns après que lo govèrn espanhòl, tanben del Partit Socialista, decidiguèt d’exumar lo cadavre del dictator Francisco Franco e de prene l’engatjament correspondent d’anullar las senténcias judiciàrias d’aquel regim. “A Franco lo cau trèir des institucions a on ei encara viu”, çò declarèt Boya.
 
Dins son fil de Twitter, Boya explica lo ròtle que lo joguèt la Legion Blanca en Aran, e cossí i es totjorn presenta. Ne soslinha la preséncia en 2017, qualques jorns abans lo referendum d’independéncia de Catalonha e Aran del 1r d’octòbre, ont cantèron l’imne dels mòrts per la pàtria. En mai d’aquò, Boya planh que las autoritats aranesas assistiscan “encantadas” a aqueles omenatges.

 
 

 
 
 

Els socialistes treuran a Franco, però avui l'Ajuntament de Vielha ha inaugurat una estàtua en record de la militar i franquista companyia d'escaladors i esquiadors de Vielha, coneguda com "la legión blanca". Obro FIL pic.twitter.com/AQVXEQmYDk

— Mireia Boya Busquet (@yeyaboya) 26 d’agost de 2018

 
 L’associacion dels ancians veterans d’aquela anciana casèrna qu’un còp per an s’amassan a Vielha. En 2017, qualques jorns abans lo referendum d’independéncia de Catalonha e Aran del 1r d’octòbre, i cantèron l’imne dels mòrts per la pàtria


 

Com ex Alcalde, ara a l'oposició a l'Ajuntament de ⁦#VielhaeMijaran⁩ una cosa és recordar una etapa de la història del poble (s'ha fet altres anys) i una altra es homenatjar a la "legión blanca". No en el meu nom!!! #VielhaNoEsDeToti ⁦@VilaWeb⁩ https://t.co/FimzpfGDrf

— Alex Moga i Vidal (@alexmoga) 26 d’agost de 2018