Lo 25 de març passat, ven de morir Jean-Yves Veillard, dit “Yann-Cheun”. Demest los 17 companhs fondadors de l’Union Democratica Bretona, es principalament Ronan Leprohon e el qu’imaginèron, en 1964, aquel novèl partit, reagissent al Movement per l’Organizacion de la Bretanha, que se disiá apolitic mas qu’en realitat èra conservator e refusava de s’engatjar per l’anticolonialisme en Argeria. De l’UDB, Ronan Leprohon fasiá lo pòrtavotz e Yann-Cheun Veillard l’encargat de premsa, venent aital lo primièr cap-redactor del Peuple breton(que conten un quasèrn en lenga celtica Pobl Vreizh) que fins ara compta 674 numèros.
 
Òme de Roazhon, crestian d’esquèrra, istorian de formacion, sa vida foguèt indefectiblament ligada a la cultura bretona. Conservator del Musèu de Bretanha de 1976 a 2000, contribuïguèt a la transformar en un musèu modèrne. Li devèm fòrça mòstras, coma la consacrada als Seiz Breur (movement artistic breton de l’Entre Doas Guèrras) que marquèron los esperits. En 1980, concebèt l’ecomusèu coma lo testimòni del passat rural de Roazhon. L’idèa, l’aceptèt la municipalitat e Albert Trochet, lo darrièr païsan que s‘èra retirat en 1982, “l’Écomusée du Pays de Rennes – La Bintinais” dobriguèt sas pòrtas al public lo 23 de mai de 1987. Un còp retirat, Yann-Cheun Veillard foguèt encargat d’una mission de coordinacion del projècte dels Camps Liures destinat a crear un novèl Musèu de Bretanha, una òbra pas encara complida.
 
Victima d’un AVC que l’aviá daissat afasic, la comunicacion amb el èra venguda plan malaisida, çò que l’aviá daissat de caire, ailàs. L’Union Democratica Bretona pèrd un de sos paires fondadors, un òme que contribuïguèt al seriós de la formacion politica. En conclusion d’un de sos primièrs articles dins Pobl Vreizh, Yann-Cheun Veillard escriviá: “Cream l’UDB per lutar a l’encòp per Bretanha e per çò que volèm per Bretanha”. Es sempre vertat uèi per l’UDB, partit d’esquèrra, ecologista e autonomista.
 
Adieu-siatz, kenavo Yann-Cheun!
 
 
 
 
Franc Bardòu