Lo presonièr nacionalista còrs Yvan Colonna se tròba dins lo còma dins una situacion fòrça grèva dempuèi qu’un autre presonièr l’escanèt dimècres 2 dins una preson de la vila occitana d’Arle. L’agression a provocat l’indignacion de partits e movements còrses, que ne jutjan responsable l’estat francés.

La polícia judiciària francesa met en examen l’atac contra Colonna coma “temptativa d’assassinat”. L’òme, Franck Elong Abé, de 36 ans, a un espés passat delictiu. Complissiá ara sa condemna en França après èsser detengut en Afganistan. Segon çò que publica Libération, l’agressor auriá escanat Colonna après que lo presonièr còrs auriá proferit una “blasfèmia”.
 
Yvan Colonna es un activista nacionalista còrs condemnat a perpetuitat en 2007 per l’assassinat del prefècte Claude Érignac. Colonna a totjorn afirmat son innocéncia e lo nacionalisme còrs considerava que i aviá de motivacions politicas dins son procès.
 
L’actual president còrs, Gilles Simeoni, foguèt, justament, l’avocat que defendèt Colonna. Simeoni a dich dins una entrevista a France Info que “los detenguts còrses èran estats designats coma de butas per de rets islamistas radicals” e qu’el meteissa n’aviá avertit dempuèi 2016 totes los “primièrs ministres e interlocutors governamentals”.
 
 
D’acusacions duras contra las autoritats francesas
 
Los partits còrses an reagit unanimament contra las autoritats francesas, que las qu’acusan d’aver negligit la seguretat de Colonna.
 
Femu a Corsica, lo partit de Simeoni, parla d’una “responsabilitat irrefutabla” de “l’estat francés” dins la situacion. La formacion autonomista, al govèrn de Corsega, remembra que de partits e d’associacions an reclamat amb insisténcia que Colonna foguèsse transferit dins un centre penitenciari còrs. “Se lo drech a l’acercament foguèsse estat aplicat”, çò ditz lo comunicat del partit, aquel “drama auriá pas agut luòc”. “Per contra”, çò contunha lo document, “la logica de revenge de l’estat, desvolopada dempuèi mai de dos decennis, a trobat uèi cima mai funèsta”.
 
Mai explicits son los dos principals partits independentistas còrses, Core in Fronte e Corsica Libera, que coïncidisson per partejar l’eslogan “Statu francese assassinu” (“estat francés assassin”) e qu’an convocat aqueste dissabte 5 una protèsta contra la prefectura a Aiacciu jos aquel meteis lèma.
 
Encara amb un ton mai elevat, l’associacion de sosten als presonièrs politics còrses, Associu Sulidarità, a demandat a l’estat francés se “la tòca” èra pas “la mòrt [de Colonna] en preson”.
 
Tanben lo Partit de la Nacion Còrsa a exprimit sos dobtes sus una possibla “mission” d’Elong Abé contra Colonna. “La situacion politica es extrèmament grèva”, çò a dich lo partit autonomista.
 
 
De recampaments dins mai d’una vila
 
Tanlèu s’assabentar de l’incident dins la preson, lo movement nacionalista còrs convoquèt divèrses recampaments de protèsta dins las principalas vilas de Corsega.
 
Dijòus 3, de centenats de membres del movement còrs s’acampèron per debatre de la situacion e an convocat una manifestacion per dimenge 6 dins la vila de Corti, capitala istorica de Corsega.
 
Lo refús de l’estat francés de menar los presonièrs politics dins de centres penitenciaris còrses es un dels refuses mai sistematics que París a donat al movement nacionalista de Corsega dins los darrièrs ans. Los partits nacionalistas còrses, qu’an ganhat tres eleccions consecutivas a l’Assemblada de Corsega dempuèi 2015 amb un sosten percentual de mai en mai naut, reclaman un estatut d’autonomia legislatiu, la cooficialitat de la lenga còrsa e la creacion d’un estatut de resident. Lo govèrn francés a pas quitat de rebutar aquelas tres mesuras.
 
 
 

---

Aquesta nòva es adaptada de Nationalia, amb qui Jornalet a un acòrdi de cooperacion.