S’inaugura deman a la mediatèca de Lesós (Limanha) l’exposicion “Paraulas de país” per tal de sensibilizar lo grand public a la preséncia de l’occitan e de la cultura occitana en Auvèrnhe. Se poirà vesitar fins al 14 d’octòbre.
 
Lo prepaus es simple e accessible. Dins un ambient festiu e acolorit, lo vesitaire descobrís un espaci abitat de personatges de talha naturala e legís lors convèrsas, coma dins una benda dessenhada, ont se remarca la preséncia de l’occitan dins los biaisses de dire, las expressions e, de segur, los patronims e toponims. Enfin, lo vesitaire se poirà pausar de questions a prepaus d’una lenga e d’una cultura que fa partida d’el e mai o sàpia pas.
 
L’exposicion es fruch d’un partenariat entre las mediatècas de la comunautat de comunas entre Dòra e Alèir e l’Institut d’Estudis Occitans del Puei Domat.
 
Dins l’encastre d’aquela exposicion, son previstas divèrsas animacions, coma una taula redonda en francés e occitan suls mestièrs e los gèstes, deman a 16h, seguida d’un concèrt audiovisual amb FeM Collectiu. Tanben i aurà de projeccions de filmes en auvernhat lo dimècres 5 d’octòbre a 19h en preséncia dels realizaires.
 
Per mai d’informacion se pòt contactar las mediatècas de la comunautat de comunas entre Dòra e Alèir e l’Institut d’Estudis Occitans del Puei Domat: