Trèva dins la guèrra comerciala entre Washington e Brussèlas. Lo president de la Comission Europèa, Jean-Claude Juncker, e lo president dels Estats Units, Donald Trump, son consents per trabalhar “ensems” a un comèrci sens taxas doanièras ni barrièras per qualques produches industrials, e per arrestar, per ara, las taxas sus las veituras europèas. O anoncièron dimècres passat Trump e Juncker dins un comunicat conjonch après una reünion a Washington. “Lo pache se basa sul fach de comprene que mentre que negociam, se cap de las doas partidas decidís pas d’arrestar las negociacions, frenam l’imposicion de nòvas tarifas e avaloram las que s’aplican sus l’acièr e l’alumini”, çò expliquèt Juncker. Segon lo comunicat, los Estats Units e l’UE son intrats dins una “nòva fasa” de lor relacion, una fasa “d’amistat pròcha” e de relacions comercialas “‘fòrtas” ont “ganhan” los dos actors. Ça que la, s’especifica pas de datas ni se concretiza de mesuras immediatas.
 
An tanben dich que trabalharàn per reduire las barrièras e aumentar lo comèrci en servicis, substàncias quimicas, produches farmaceutics e medicals e soja. Una autra mesura pachada après l’amassada es de “refortir” la cooperacion estrategica sus l’energia e de veire que l’UE impòrte mai de gas natural descalhat estatsunidenc per diversificar son provesiment. En mai d’aquò, l’acòrdi ditz tanben que los dos actors comercials obraràn “estrechament” amb lors sòcis per reformar l’Organizacion Mondiala del Comèrci e abordar de practicas comercialas desleialas, coma lo panatòri de proprietat intellectuala o las subvencions industrialas.
 
Segon las donadas que publica aquel comunicat, los Estats Units e l’Union Europèa amassa an mai d’830 milions de ciutadans, mai del 50% del PIB global e mantenon una relacion comerciala bilaterala de mai d’800 miliards d’èuros.
 
 
La guèrra comerciala, de l’acièr e l’alumini a las veituras
 
Dempuèi lo començament de junh, los Estats Units an impausat de taxas doanièras del 10% e del 25% a las importacions d’acièr e d’alumini de l’UE. Coma mesura de “reequilibri”, a la fin del mes la Comission Europèa apliquèt de nòvas tarifas del 25% a una longa lista de produches estatunidencs coma los jeans, los objèctes d’acièr, lo whisky, lo tabac, las motocicletas, los vaissèls de vela o de motor per léser e per espòrt, lo milh, lo chuc d’irange, los avajons e de produches de maquilhatge, entre d’autres.
 
Lo meteis jorn qu’intrèron en vigor las nòvas taxas doanièras, Trump menacèt l’UE amb de tarifas del 20% sus “totas las veituras” europèas. Davant l’anóncia, Brussèlas avertiguèt los Estats Units de las repercussions e respondèt tanben en menaçant de nòvas represalhas.