Lourdes Bruna qu'a guanhat eth prèmi Lengua Viua autrejat ena ocasion dera 25u edicion dera corsa Aran per sa Lengua, realizada en Aran aguest dimenge passat. As sòns 17 ans d'edat, Bruna s'ei distinguida per èster era prumèra persona qu'a revendicat eth sòn dret de hèr er examen d'accès ara universitat en occitan. “Sonque è estat era prumèra, beth un auie d'èster, ara demoregam que se presente molta mès gent e que s'incentive mès des der Institut tà hèr bèth examèn en aranés, sustot en bachelierat”, çò a dit ara còlha de Jornalet.
 
Enguan Lengua Viua qu'a autrejat es sòn dus prèmis as mès joeni. En aguest sens, Aleix Filloy Cavero qu'a guanhat eth prèmi deth dessenh dera samarreta, era principau hònt de sòs entà finançar er eveniment, qu'enguan a auut fòrça succès e agotant totes es sues existéncies en tot deishar sonque es talhes tà enfants.
 
 
“Enguan auem tornat a èster caushigats”
 
Era senténcia deth Tribunau Constitucionau contra er usatge prioritari der occitan en Aran qu'a mercat enguan era revendicacion dera corsa Aran per sa Lengua. Un eveniment que comencèc hè 25 ans tanben en tot revendicar era escòla ena lengua deth país “hè 25 ans comencèrem pr'amor que mos caushiguèren ben era nòsta lengua perque ei quan volérem implantar ena escòla er aranés e quauquarrés non i siguec d'acòrd”, çò a dit a Jornalet Rosa Maria Salgueiro, presidenta dera Fondacion Musèu dera Val d'Aran, organisme a on aparten Lengua Viua. “Enguan auem tornat a èster caushigats, en prumèr lòc per trèir dera Lei d'Aran er usatge, e dempús pes paraules deth ministre d'educacion e cultura”, çò apondèt Salgueiro en referéncia as declaracions de Méndez de Vigo de hereuèr passat. Rebrembam que quauqui dies dempús qu’eth Tribunau Constitucionau espanhòu cancelèsse era prioritat dera lengua occitana en Aran, eth ministre dera educacion e dera cultura espanhòu, Íñigo Méndez de Vigo, que se’n trufèc en dident qu’eth solet risc qu’auien es que parlen aranés èren es lauegi.
 
 
Era corsa Aran per sa Lengua
 
Era corsa Aran per sa Lengua qu'ei actuauments er eveniment annau mès demorat e seguit deth país de cap de Garona. Milèrs d’aranesi reclamen er usatge sociau dera lengua occitana en ua jornada revendicatiua, esportiua e hestiua. Cada darrèr dimenge de junhsèga, caminaires e correires que gessen de Les, de Montgarri o deth Pòrt de Vielha e que s’amassen ath ser ena plaça de Vielha. Aquiu que se i amassen normauments un milèr de persones, e dempús des actes e des discorsi, un brave e animat concèrt de Nadau que claue ua jornada que cada an ven istorica.
 
 
Partejar era corsa sus Facebook
 
Enguan, ara ocasion deth 25u anniversari, Lengua Viua qu'a lançat ua crida a toti es participaires entà partejar toti es moments dera jornada. En aguest sens, qu'an demanat de publicar ena pagina Facebook de Lengua Viua totes es fòtos, vidèos, imatges, etc. sus eth desvolopament dera corsa en tot caminar, en es moments de pòsa, ara ora deth dinnar popular...
 
“Imatges que siguen ua mòstra dera hèsta dera nòsta lengua e der esperit que toti viuem eth dia dera Corsa d’Aran per sa Lengua”, çò demane era còlha de Lengua Viua deth temps que precise que non se publiquen imatges damb connotacions politiques o que non tòquen era Corsa d’Aran per sa Lengua.
 
 
 
 
ZA/FM
 
 
 

---

Galaria de fòtos de Zep Armentano