S’agís de dos exemplars de balena becuda de Bahamondes (Mesoplodon traversii), una espècia que fins ara solament se n’èra localizat de rèstas d’òsses e se cresiá que s’èra estencha. Las doas balenas, un pichòt mascle de 3,5 mètres e la siá maire de 5 mètres de long, foguèron localizadas sus la plaja d’Opape en decembre de 2010, mas s’èra pensat qu’èran d’exemplars d’una espècia comuna dins la zòna, las balenas becudas de Gray.
 
L’analisi de l’ADN de las doas balenas determinèt que s’agissiá d’una autra espècia, la balena becuda de Bahamondes. Fins ara solament se’n coneissiá qualques paucas rèstas d’òsses trobadas en Nòva Zelanda e en Chile dins un periòde de 140 ans.
 
La biologista Rochelle Constantine, qu’a participat a l’estudi de las doas balenas, considèra que la trobalha es fòrça importanta en prenent en compte lo temps qu’es passat sens cap de pròva de vida d’aquel grand mamifèr. Constantine o justifica amb la possibilitat que la balena becuda de Bahamondes siá una espècia que viu e morís solament en aigas fòrça prigondas de l’ocean e que siá fòrça malaisit qu’arribe arrossegada a la còsta.