La promessa electorala de François Hollande, de legalizar lo maridatge e l’adopcion pels parelhs omosexuals, foguèt presentada dimècres passat al conselh dels ministres. Los partits de drecha e la Glèisa Catolica s’i opausan.

Hollande a declarat qu’aquel projècte deu èsser “un progrès non solament per qualques unes mas per tota la societat”, del temps qu’a desirat que lo debat siá “respectuós de las opinions e de las cresenças”, segon çò que diguèt a l’AFP la pòrtavotz del govèrn Nadjat Vallaud-Belkacem.
 
Ça que la, aquel projècte poiriá evolucionar dins lo Parlament, que l’examinarà en genièr per daissar mai de temps al debat.
 
Per l’Associacion dels Parents Omosexuals e Lesbians “Lo projècte de lei es una granda avançada, fòrça importanta per la proteccion juridica de las familhas omoparentalas”. Pels opausants s’agís d’una fallàcia.
 
La Glèisa Catolica i es completament opausada, e d’integristas coma l’Institut Civitas apèlan a manifestar contra lo maridatge egalitari lo 18 de novembre. D’autres opausants, coma los antiavortistas d’Alliance Vita, organizan de concentracions lo 17 de ser.
 
De son costat, l’associacion Inter-LGTB a apelat a manifestar dimècres de ser près de l’Assemblada Nacionala a París.
 
L’associacion SOS Homophobie a sustot soslinhat qu’aquestes darrièrs ans, entre los païses europèus —dont Espanha e Portugal— qu’an acceptat lo maridatge e l’adopcion pels parelhs de meteis sèxe, “cap d’eles es pas intrat en la decadéncia anonciada”.
 
En fach, dimars passat, lo tribunal constitucional espanhòl validèt la lei sul maridatge e l’adopcion pels parelhs omosexuals en anullant lo recors que lo PP aviá presentat fa qualques ans.
 
Segon un sondatge IFOP per Le Monde, publicat dimècres passat, los ciutadans de l’Estat francés son favorables a 65% al maridatge omosexual e a 52% a l’adopcion per de personas de meteis sèxe.