Semblava que seriá mai complicat mas Barack Obama a capitat la reeleccion coma president dels Estats Units plan aisidament. La nuèch electorala es estada marcada per una batalha en Florida, un estat que Mitt Romney aviá de besonh de ganhar e qu’es pas encara clar de quin costat es. La possibla victòria d’Obama en Florida daissava gaireben sens opcions lo candidat republican. Mas dimècres, a sièis oras del matin, ora d’Occitània, las televisions an ja proclamada la victòria d’Obama quitament abans de saber lo resultat final de Florida.

Obama a ganhat en vòtes electorals (303 contra 206), e mai se lo vòte popular es estat fòrça mai egalizat. A capitat  dins qualques unes dels estats mai decisius, es a dire, aqueles qu’an pas una color politica clara. A capitat en Colorado, en Iowa, en Nòu Hampshire, en Ohio, en Pensilvània, en Virgínia e en Wisconsin.
 

“Çò melhor es encara avenidor”
 
Obama a exprimit la volontat de parar la man a Romney e als republicans, conscient que son segond mandat serà complicat, vista la victòria republicana dins la Cambra dels Representants. “Qu’ajatz portat una bandieròla d’Obama o una de Romney, çò mai d’important es qu’avètz fach sentir la vòstra votz”, çò diguèt. Pasmens, lo president estatsunidenc a fach valer sos primièrs quatre ans de mandat. “Nos sèm salvats, e çò melhor es encara avenidor”, çò declarèt dins lo sèti democrata de Chicago, ont foguèt recebut amb de crits d’euforia.
 
A revendicat la valor integradoira que deu aver la societat estatsunidenca. “Cresi que podèm manténer la promessa que fondèt aquel país: impòrta pas d’ont venètz, se sètz ispans, afroamericans o blancs, omosexuals, se trabalhatz per capitar lo vòstre sòmi. Sèm mai grands que la soma de las nòstras ambicions individualas”.
 
E a centrat una part de son discors sus l’immigracion. “Cresèm en una nacion d’immigrants ont qui que siá pòt luchar. Cresèm en una nacion d’immigrants”.
 

Los republicans mantenon la Cambra dels Representants
 
La sola marrida nòva de la nuèch, pel president dels Estats Units, es estada que los republicans an mantengut lo contraròtle de la Cambra dels Representantas, çò que contunharà de donar fòrça problèmas per governar. Lo Senat, coma èra tanplan de preveire, es demorat en mans dels democratas.
 
Las eleccions an tornat soslinhar la division politica dels Estats Units. Practicament i a pas agut d’estonaments e los territòris blaus e roges se son comportats generalament coma òm esperava. Romney a pas capitat d’arribar al delà de la basa politica republicana: aquò es benlèu una de las rasons de sa desbranda. De son costat, Obama a aprofechat, coma fa quatre ans, lo vòte dels joves, dels urbans e de las minoritats, mai que mai dels afroamericans e dels ispans.