Durant tot lo mes d’agost se pòt veure sus tota la planeta una pluèja d’estelas excepcionala. Es lo fenomèn de las Perseïdas. S’agís de la posca illuminada de la cometa Swift-Tuttle que se coneis popularament coma las Lagremas de Sant Laurenç.  A çò espectaclós de las coas dels meteòrs i cal apondre lor caractèr efemèr e fugaç, çò qu’autreja a l’observacion una dòsi suplementària de magia.
 
E mai se son visiblas del 23 de julhet al 22 d’agost, lo moment perfièch per observar las Lagremas de Sant Laurenç ongan serà dins la nuèch de dimenge 12 a diluns 13 d’agost. En mai d’aquò, aquel fenomèn se veirà fòrça melhor gràcias a la novèla luna: l’observacion serà ansin fòrça pus clara.
 
“Las comètas, que son de conglomerats de glaç, de dioxid de carbòni e de residús solids, s’evaporan rapidament quand se sarran del Solelh. Venon un gas qu’empòrta de particulas solidas, e daissan un estralh amb aquelas sòbras”, çò explica l’astronòm catalan Enric Marco a VilaWeb.
 
Las Perseïdas se pòdon obervar a l’uelh nud. Mas cal cercar un endrech sens pollucion luminosa e es necite que lo cèl siá clar. Los uèlhs umans an de besonh d’unes trenta minutas per s’adaptar a la sornièra. Es preferible de se jaire sul sòl e d’agachar devèrs lo nòrd-èst, en direccion de las constellacions de Persèu e Cassiopèa.