En seguida del decès d’un enfant de quatre ans, vint e quatre oras après una operacion de las amigdalas, lo parquet de Clarmont-Ferrand a dobèrt una “enquèsta en recèrca de las causas de la mòrt”.
Los parents de l’enfant mòrt, Florence e Grégory, faguèron lor denóncia divendres 26 d’octòbre per determinar las causas de la mòrt de lor filh Audric, mòrt dijòus 25 d’octòbre, l’endeman d’una operacion de las amigdalas en una clinica de Vichèi (Limanha Borbonesa).
“Foguèt operat dimècres a 11h30. Poguèrem sortir de la clinica lo 25, dètz oras puèi. Aviá de dolors après l’operacion, mas coma après totas las operacions”, çò declarèt la maire d’Audric al jornal nòrd-occitan La Montagne.
En tornant a l’ostal, près de Brot lo Vernet, Audric comencèt de tossir e d’escupir de sang. L’incident venguèt còp sec una emorragia massissa. La maire ensagèt d’intervenir. “Lo vegèri partir coma vos vesi”, çò diguèt. “La vida del mieu filh s’acabèt en qualques minutas”.
Lo parquet de Clarmont-Ferrand a dobèrt una “enquèsta en recèrca de las causas de la mòrt”, amb una autopsia practicada l’endeman del decès.
Los parents an decidit de far lor denóncia, per comprene “çò que s’es passat”.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Cal escatir els errors mèdics si s'han produït...!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari