Un segment del pont Morandi, ont passa la rota A10 per la vila de Gènoa, s’esfondrèt dimars passat en daissant un balanç provisòri d’almens 39 mòrts. Mas i a de milièrs de tonas de tarcums per remòure e dejós i poiriá i aver fòrça mai de victimas. Per ara an capitat a socórrer una dotzena de personas vivas.
 
Lo pont Morandi travèrsa lo riu Polcevera (o Pûçéivia en ligur) al nòrd del centre de la vila. Se rompèt subran mentre que i passavan de veïculs. Lo pont es fòrça conegut perque una granda partida de la circulacion qu’intra en Itàlia passa per aquí. Lo cap del Departament de Proteccion Civila, Angelo Borrelli, confirmèt qu’almens 30 veituras e divèrses camions èran sul pont quand s’èra esfondrat.
 
Òbra de l’engenhaire Riccardo Morandi, lo pont Morandi se bastiguèt entre 1963 e 1967. Travèrsa lo riu Polcevera (o Pûçéivia en ligur), que sus son estuari se tròba lo pòrt de Gènoa. Lo pont a una longor de 1182 mètres e se situa entre 45 e 55 mètres subre lo sòl. L’an 2016 se faguèt un renovelament d’a fons del pont.
 
 
Lo govèrn acusa la societat que gerís las autoestradas
 
Per ara, lo govèrn d’Itàlia rend responsabla de la catastròfa la societat privada Autostrade per l’Italia, segon Il Fatto Quotidiano. Ça que la, lo debat public se consagra a las condicions del pont, mai que mai en Itàlia.
 
Divèrses expèrts avián avertit que lo pont aviá de problèmas estructurals. O faguèt mai que mai lo professor associat d’estructuras de betum de la Facultat d’Engenhariá de Gènoa, Antonio Brencich. Dins un article publicat en 2016 per Ingegneri.info, l’especialista remarcava “una avaloracion incorrècta dels efièches de la contraccion del betum que produsiá un plan d’estrada non orizontal”.
 
Ça que la, interrogat pels mèdias italians, Giovanni Castellucci, director general d’Autostrade per l’Italia que gerís las autoestradas en aquel país, diguèt après la tragèdia que i aviá “pas cap de document que mençonèsse lo mendre perilh” dins lo pont.
 
Lo debat sus las bonas o marridas condicions del pont e l’infrastructura es caud dins los mèdias italians. Segon Il Fatto Quotidiano, al moment de l’accident se fasiá d’operacions de renovacion. Los trabalhs avián un còst de mai de 20 milions d’èuros, comencèron lo 3 de mai passat e devián èsser realizadas dins lo relambi d’un an.
 
 
Un pericle
 
Segon qualques testimònis, l’impacte d’un pericle sus l’infrastructura pendent la fòrta tempèsta que i aviá a aquel moment auriá amodat la tragèdia.
 
Las causas d’aquel escrancament son encara desconegudas. L’agéncia de d’informacions italianas Ansa soslinha que, segon los primièrs indicis, l’accident poiriá èsser estat causat per una ‘malescasuda estructurala’ de l’òbra.
 
 
Dos cents pompièrs al trabalh de salvament
 
Dos cents pompièrs trabalhan al socors dels subrevivents e cèrcan los còrses de las personas que son mòrtas, tuadas per la casuda, de gaireben 50 mètres, o tustadas per un element de l’estructura de betum.
 
Son estats tanben afectats qualques edificis del poligòn industrial percorreguts pel pont.
 
Unas quatre cents personas que demòran près del viaducte son estadas deslotjadas preventivament.


 
 
 

#Genova#14ago 14:30, prosegue l’intervento di soccorso, 200 #vigilidelfuoco impegnati nelle operazioni pic.twitter.com/cOKLlRAnSK

— Vigili del Fuoco (@emergenzavvf) 14 d’agost de 2018