Lo president de Tunisia, Muhammad Al Baji Qaid As Sabsi (sovent tanben transcrich «Béji Caïd Essebsi») anoncièt diluns passat son sosten a un projècte de lei per que los òmes e las femnas sián egals en matèria d’eiretatge. La lei actuala se fonda sus la lei islamica e establís que los òmes eiretan lo doble de las femnas amb los meteisses ligams familials.
 
Lo projècte de lei actual prevei que l’eiretatge siá egalitari per defaut, mas compòrta una excepcion que permet de manténer las condicions actualas se lo proprietari del patrimòni o a establit d’en primièr davant un notari. Per tant, Yosra Frawes, avocata e feminista tunisiana, planh que lo president aja “pas fach tot lo camin”, car segon ela auriá calgut establir “coma obligatòria” l’egalitat entre los òmes e las femnas davant un eiretatge.
 
 
“Una ofensa a la paraula de Dieu”
 
Dissabte passat, de milièrs de personas s’acampèron davant lo parlament tunisian per protestar contra la proposicion de lei. Considèran que la lei, se s’aprovèsse, seriá antimusulmana. Per eles, es una ofensa a la paraula de Dieu e o considèran coma una menaça a l’identitat islamica del país. La manifestacion l’organizava la Coordinacion Nacionala per la Defensa de l’Alcoran, de la Constitucion e del Desvolopament Equitable, un grop conservator que son director es l’èx-ministre tunisian dels afars religioses.
 
Eles argumentan que l’òme deu èsser favorit perquè aqueste ten la responsabilitat de fornir los bens necessaris a l’ostal.
 
De son costat, Halima Jouini, membre de l’Associacion Tunisiana de las Femnas Democras, recòrda que los ròtles an cambiat: “Ara la femna es la responsabla dels parents e de la familha, l’òme es pas pus lo sol responsable o lo cap de la familha; doncas cal adaptar la legislacion a aquel cambiament”.