Entre lo 12 e lo 18 de d’agost a luòc a Vilanuèva d’Òlt una setmana conviviala dins una residéncia que servís d’escòla e de lotjament a l’encòp. D’aquí estant nos an mandat a Jornalet una cronica de la primièra jornada de l’EOE, que publicam en seguida.

Diluns: la setmana occitana comença
 
 
A 8h45 s’amassan totes los estagiaris de l’Escòla, e los professors presentan lors corses. N’i a doas opcions: lo cors normal (doas oras per jorn, de 9h a 11h) e lo cors intensiu (6 oras per jorn, de 9h a 12h e de 14h a 17h). Aquestas doas modalitats an tanben de separacions per dialècte (ongan sonque lengadocian e gascon, per manca de professors dels autres dialectes) e per nivèl (nivèl debutant, mejan e confirmat).
 
Lo mond participan a aqueles corses menats per de professors benevòls, que s’adaptan als ritmes e als besonhs dels escolans.
 
En mai d’aqueles corses i a l’Escoleta, qu’a luòc de 9h a 12h15 e de 14h a 17h, pels enfants de 4 a 9 ans. Demest eles i a dos catalans, de 4 e 5 ans. A l’Escoleta, fan de cançons, escrivon un pauc, fan de trabalhs manuals, de musica, de jòcs tradicionals...
 
A 11h s’ofrís un primièr obrador de cant, en defòra dels corses, menat per Yves Séguier. Es lo meteis professor que mena tanben lo talhièr de danças d’aprèp-manjar, de 14h a 15h.
 
Pels estagiaris que seguisson lo cors normal al matin, a 15h començan los obradors: cal causir entre «Toponimia occitana», «Escotar e tornar dire» (pels qu’entamenan l’estudi de la lenga), «Passejadas per Agenés», «Obrador de Lenga e Cultura Catalana» (menat per una professora del CAÒC), e un talhièr d’elaboracion d’instruments musicals...
 
A 17h s’acaban aqueles obradors e començan mai d’una conferéncia cada jorn, plan interessantas.
 
E mai, dins l’escòla se tròba l’estanquet, lo talhièr de convèrsa interdialectala, doncas es lo luòc per se trobar, per charrar, per se conéisser e beure un còp!
 
A 19h, dins la sala polivalenta, se ten la presentacion oficiala de l’Escòla, amb los parladisses del president de l’escòla, Bernat Bergé, e de qualques representants de la comuna de Vilanòva d’Òlt, del departament e de l’ÒPLO. Après lo parladís, la comuna de Vilanòva convida a un aperitiu per totòm.
 
Aprèp sopar, la serada se passa en agachant un filme plan conegut, doblat en occitan, Paddington. Lo cinèma se projècta a l’exterior, dins la cort de l’escòla. Lo temps acompanha pas gaire, amb de pluèja fina, mas totes dejós las terrassas agacham aqueste film plan doblat e plan amusant. En seguida, ven lo balèti de cada nuèch.
 
 
 
 
 
Meritxell Pueyo