Lo celèbre musician catalan Jordi Savall a dirigit aquesta setmana una orquèstra de musicians refugiats pendent lo concèrt inaugural del 6n Festenal de Musica Anciana de Poblet, en Catalonha. Se tracta del projècte Orpheus XXI, un projècte intercultural, pedagogic e creatiu que reünís mai de 500 joves musicians sirians, curds e afgans, totes migrants e refugiats.
 
Durant lo concèrt, Savall revendiquèt que se donèsse als migrants l'oportunitat de portar lor cultura a nòstra comunautat e qu'òm lor daissèsse far çò sabon melhor far: "[Son] de gents qu'èran perdudas, que subrevivián mal, e ara an pogut trobar un biais digne de far lor trabalh, en fasent çò qu'eles sabon far, de musica, en ensenhant a d'enfants que son tanben desrasigats", çò expliquèt Savall.
 
Dins aquel quadre, Savall a programat pel festenal d'ongan quatre concèrts e quatre conferéncias per far pensar sus la memòria e los simbòls del poder, de la fe e de l'exili.
 
Savall mostrèt una sensibilitat especiala envèrs nòstre país en rendent omenatge a Occitània dins son trabalh Lo reialme oblidat, un libre e 3 CD amb de cançons, de poèmas e d’autres tèxtes de la Crosada contra los catars. Aquel “omenatge al País d’Òc” es publicat en sèt lengas, dont l’occitan.