Entre lo 12 e lo 18 de d’agost a luòc a Vilanuèva d’Òlt una setmana conviviala dins una residéncia que servís d’escòla e de lotjament a l’encòp. Jornalet encoratja los participants de nos mandar lors rapòrts, impressions, imatges, istòrias... Vaquí lo rapòrt que nos an mandat Guilhèm Tomàs e Ives Seguier amb la collaboracion de Gemma Fernández e Patrici Gentié.

Fa caud mas l’aire es fresc. Avèm trabalhat tota la jornada mas per las cinc oras del vèspre totes nos podèm tornar trobar en bas a l’estanquet. Un grand rebaladís se forma, de mond sorisents que se passan torn a torn bièrras, chucs, pastisses, bolats de cacauèts. Lo servici se fa en musica.  E lo mond se botan defòra e rescontran l’amic qu’an daissat totara per se n’anar se despensar dins un obrador de cant, de dança, dins de passejadas dins lo país d’Olt, de toponimia ... N’i a que sabon ja. N’i a qu’aprenon. Mas totes se fan plaser, e quand siropejan lor bevenda fresca es amb lo sentiment d’una jornada plan completa.
 
D’unes prenon un apèro cortet, que vòlon participar a una conferéncia, d’autres lo fan durar per que las charradissas s’arrèsten pas.  Es un plaser de prene l’aperitiu defòra.  Las gents venon de pertot mas an lèu fait de far coneissença. Cadun arriba amb son projècte, son idèa, son enveja, e venon quèrre quicòm.
 
Es fòl totun d’arribar dins aquel banh d’energia amb tant d’interès e de curiositat tot sobde per la nòstra lenga, mentre que las  autras 51 setmanas de l’annada la nos cargam amb lo fais dels rasonaments costumièrs. L’EOE fonciona coma un punt de convergéncia de las energias positivas. Lo mond s’escotan, rison, e se respèctan sens jamai aver besonh de se referir a una autoritat quina que siá. Cresiam benlèu pas pus qu’una societat poguèsse foncionar aital.
 
Una societat que parla en occitan. Que jòga d’a fons lo jòc de la lenga. Quitament per los que la venon aprene. L’immersion interdialectala es completa. Catalans, occitans, russes, estatsunidencas ... las diferéncias s’escafan.
 
Al cap d’un brieu la lassièra se fa sentir. Que l’escòla se viu amb intensitat. Que los estagiaris ne vòlon totjorn mai. Mas se daissan pas far. Tiran las taulas e manjan amassa defòra. Se balhan de vam, que la  serada serà longa.
 
 
 
 
Guilhèm Tomàs e Ives Seguier

 
 
 

---

Sit web: www.eoe-oc.org
Facebook: @escolaoccitanadestiu