Qualques parents de las personas mòrtas per l’esfrondrament del pònt Morandi de l’autoestrada A10 a Gènoa an refusat las funeralhas d’estat que se faguèron dissabte de matin, perque considèran que l’estat italian es tanben responsable de las mòrts. Concretament, lo jornal La Stampa ditz que los qu’an boicotat la ceremònia son las familhas de 17 victimas mortalas, practicament la mitat del total. La chifra oficiala de victimas es de 41 personas mòrtas, après que los pompièrs trobèron una veitura espotida jos un blòc de betum.
 
“Es l’estat qu’a causat aquò, lor devèm pas permetre de se mostrar: la passejada de politicians es estat vergonhosa”, çò declara dins aquel jornal la maire d’un dels quatre joves de Nàpols que moriguèron quand èran en vacanças. Lo paire d’una autra de las victimas ditz que son filh “vendrà pas un numèro dins un catalòg de mòrts causadas per las errors italianas. Volèm pas de funeralhas que sián una farça, mas una ceremònia en cò nòstre”.
 
La ceremònia se tenguèt dins la fièra de Gènoa e i participèron lo president de la Republica italiana, Sergio Mattarella, los presidents de las doas cambras legislativas, Roberto Fico e Maria Elisabetta Casellati, lo primièr ministre, Giuseppe Conte, e los vicepresidents e caps dels dos partits que sostenon lo govèrn: Luigi Di Maio e Matteo Salvini. I participèron tanben d’ancians membres del govèrn italian, que foguèron la buta de qualques crits e insultes per èsser considerats coresponsables de la marrida gestion de las infrastructuras del país.