A Seborca es un vilatge de Liguria fòrça pròche d’Occitània que se revendica coma principat independent. Diluns passat, celebrava sa fèsta nacionala dins lo quadre d’un particular còp d’estat fach per Internet jos la bailiá d’un parisenc.
 
Amb un pauc mai de 320 abitants, A Seborca declarèt son independéncia d’Itàlia en 1963 en vertut d’un ancian estatut de Principat jamai anullat, en retenent coma non valida l’annexion al reialme de Sardenha, e puèi a Itàlia. Son primièr prince foguèt Jòrdi Ir (1963-2009) e son prince actual es Marcèl Ir.
 
Mas en febrièr passat, un òme d’afars parisenc nomenat Nicolas Mutte ensagèt de reversar lo poder de Marcèl Ir en se revendicant prince sus Internet. Nascut en 1970 près de París, Nicolas Mutte, se proclama Nicolau Ir d’A Seborca.
 
 
L’istòria
 
L’estat italian considèra que l’endrech es pas qu’una comuna transalpenca coma las autras, amb son cònsol màger coma las autras. L’istòria, totun, remonta a 1963 quand Giorgio Carbone organizèt un referendum per contestar l’annexion d’A Seborca per Itàlia. Foguèt un plebiscit, çò rapòrta Nice-Matin. Carbone s’apiejava sul fach d’una error administrativa durant la crompa del principat eclesiastic pel duc de Sardenha. Lo duc paguèt pas la crompa e lo tractat foguèt pas jamai ratificat.
 
Après lo vòte, Giorgio Carbone foguèt proclamat prince Jòrdi Ir. Aqueste escriguèt una Constitucion qu’estipula que los princes devon èsser elegits cada sèt ans. Après sa mòrt en 2009, Marcello Menegatto venguèt Marcèl Ir, elegit pels seborgians per li succedir. En 2017 foguèt reelegit.
 
 
Un sit web en francés per prene lo poder del Principat
 
Lo ciutadan francés Nicolas Mutte foguèt convidat un còp a A Seborca per i presentar son libre Napoléon - résurrection. Alavetz deguèt flairar l’oportunitat de donar un còp de pè, e d’estat.
 
En febrièr de 2016, Mutte s’autregèt lo títol de prince d’A Seborca en creant un sit internet en francés a son efigia. Mutte reclama lo principat coma part de la Francofonia, anóncia qu’un “novèl capítol del principat s’es escrich” e pòsta una Constitucion e quitament un imne nacional en francés nomenat “La Seborgienne”. Puèi percorreguèt lo Mond, mai que mai Africa, en se presentant coma lo prince legitim d’A Seborca.
 
Mentretant, Marcèl Ir faguèt sa denóncia al ministèri public de la província d’Imperia en abril de 2016 per usurpacion d’identitat. Per ara, la justícia s’es pas prononciada.
 
E mai se presenta una Constitucion en francés, e un sit web en francés e albergat en França, Nicolas Mutte se revendica ligat al principat dempuèi sa naissença en afirmant qu’a de documents qu’atèstan de ligams de sos ancessors sus las tèrras d’A Seborca dempuèi Napoleon III. En mai d’aquò, lo pòrtaparaula del sospechat prince parisenc afirma que “Marcèl Ir a pas mai de legitimitat al tròn: es membre d’una associacion folclorica. Es doncas estat elegit dins un quadre folcloric e non estatal”.
 
 
Sostengut per una sècta
 
Dempuèi junh passat, Nicolas Mutte residís al principat d’A Seborca dins un ostal prestat per la sècta apelada Madonna di Alvenia. Se tracta d’un grop religiós qu’a establit son pròpri culte e qu’es senhalat pels grops de recèrca sus las sèctas francés e italian (GRIS e UNADFI respectivament). Segon Riviera 24, quitament lo Vatican es inquiet per l’espelida d’aquel grop religiós sul luòc.
 
Nicolas Mutte “arribèt amb sa còla lo 14 de junh. Voliam que nos ajudèsse a far d’A Seborca un estat esperital”, çò diguèron, segon Nice-Matin, los fondadors d’aquela sècta Stéphane et Marie-Dominique Ravel d’Estienne. Lo prince Marcel Ir a promulgat un decret per refusar la nacionalitat seborgiana a aquelas personas, çò rapòrta San Remo News.
 
Mas segon Nice-Matin tanben l’entorn del putschista parisenc a romput tota relacion amb los Ravel d’Estienne, perque patirián “un deliri mistic e malsan”.
 
 
Un país amb sa moneda
 
Lo principat d’A Seborca a sa pròpria moneda, lo luigino, en remembre de las monedas fachas al sègle XVII. Aqueste a solament de valor dins la vila ont es emplegat coma moneda locala. Pasmens, lo Luigino a desvelat un interès dins lo Mond del colleccionisme numismatic. La valor donada es fixada a 6 dolars estatsunidencs.
 
A Seborca a tanben sas pròprias immatriculacions automobilas, mas pòdon pas èsser legalament utilizadas qu’al costat de las italianas. A mai, las cartas d’identitat, los passapòrts e d’autres timbres del principat son mai emplegadas per lor valor folclorica e toristica que non pas legala.
 
La Republica Italiana reconeis pas lo principat d’A Seborca e considèra qu’aquel vilatge es de jure e de facto jos jurisdiccion italiana.