Malgrat que Carles Puigdemont siá pas pus l’objècte d’un mandat d’arrèst internacional, la gendarmariá francesa lo cerquèt en Catalonha Nòrd aquesta setmana passada. Lo mèdia francofòn Equinox se demanda quinas son las basas judiciàrias sus las qualas se fondariá la gendarmariá francesa per ensajar d’arrestar lo president de la Generalitat de Catalonha en exili.

Los gendarmas cèrcan Puigdemont en Conflent
 
Lo primièr mèdia que lancèt l’alarma foguèt lo jornal catalan El Món que raportèt que la polícia francesa aviá telefonat a la direccion de l’Universitat Catalana d’Estiu de Prada de Conflent per saber se Puigdemont anava intervenir dins aquela conferéncia de Brussèlas estant o se seriá present fisicament. Lo responsable de l’eveniment respondèt que lor podiá pas donar aquela informacion pr’amor qu’aviá quitament pas entendut que Puigdemont participariá a l’eveniment. Pasmens, los gendarmas se presentèron sus plaça per demandar se lo president catalan èra aquí e a quin endrech seriá possible de lo localizar.
 
 
Una enquèsta de rotina
 
La redaccion d’Equinox contactèt la gendarmariá francesa e la responsa foguèt qu’ela aviá pas jamai agut l’intencion d’arrestar Puigdemont, mas que s’agissiá d’una simpla procedura de rotina. “Del temps que s’ausís a parlar de la venguda d’una personalitat, del showbiz o de la politica per exemple, realizam totjorn una enquèsta per ne verificar la veracitat; puèi, se l’informacion es exacta, metèm en plaça las mesuras de seguretat adaptadas, per evitar de movements de molonada o los risques d’atemptats”, çò precisèt un pòrtavotz del còrs. Segon la redaccion d’Equinox, lo pòrtavotz de la gendarmariá èra susprés de l’amplor de l’informacion al sud dels Pirenèus.
 
 
Una error de L’Indépendant
 
Un article de L’Indépendant aviá alarmada la gendarmariá francesa. La redaccion d’aquel jornal s’enganèt e confondèt lo nom de Jordi Puigneró amb lo de Puigdemont. Puigneró es lo conselhièr de las politicas numericas de la Generalitat de Catalona, e si que participèt a l’Universitat Catalana d’Estiu a Prada de Conflent.
 
 
L’estat francés n’es pas segur
 
Ça que la, lo problèma es pas la confusion del redactor d’aquel jornal mas lo fach que l’eventual preséncia de Puigdemont dins los territòris de l’estat francés aja alarmada la gendarmariá.
 
Segon l’avocat de Carles Puigdemont, Jaume Alonso-Cuevillas, son client pòt viatjar dins lo Mond entièr franc de França, ont “la situacion es complicada” per el.