Lo vicepresident de l’Ofici Public de la Lenga Occitana, Patric Roux, a anonciat sus las ondas de Ràdio País que l’Ofici farà un apèl a projèctes per tornar lançar un jornal en occitan. Dins aquel sens, Roux planh la desaparicion de La Setmana e mai se la justifica per manca d’abonats e d’avenidor. Quant a la crisi de l’occitanisme, pensa que lo militantisme a ja capitat a banalizar lo nom d’Occitània e de l’occitan dins Occitània tota —pas solament la region mas lo país entièr— mas crei que las associacions an pas reüssit lors activitats. Per tant, prepausa un cambiament de natura e que siá l’administracion publica que prenga en carga lo combat occitanista.

L’Ofici Public de la Lenga Occitana (ÒPLO) farà en setembre que ven un apèl a projèctes per tornar lançar un jornal en occitan. Atal o a anonciat lo vicepresident de l’organisme, Patric Roux, sus Ràdio País dins una entrevista facha dins l’encastre del Hestiv’òc.
 
“La question d’un jornal en occitan deu contunhar de se pausar, e tre la dintrada, tre lo mes de setembre, farem çò que cal per lançar un apel a projèctes per un novèl jornal en occitan, perque ne cal un. La decision es pas jamai estat de dire ‘volèm pas de jornals en occitan’, ne volèm un, mas ne volèm un que marche, ne volèm un amb d’abonats, ne volèm un amb un lectorat”, çò diguèt Roux, qu’es tanben president del CIRDÒC e elegit de la region qu’a pres lo nom d’Occitània.
 
 
A prepaus de la mòrt de La Setmana
 
Justament, Roux precisèt que voliá un projècte “amb d’abonats” e “amb un lectorat” perque veniá de justificar la desaparicion de La Setmana.
 
D’un caire, l’elegit assolidèt que “çò que s’[èra] passat efectivament [èra] grèu”, e qualifiquèt la desaparicion del jornal occitan de “pietadosa”. En mai d’aquò, precisèt qu’èra estat abonat a La Setmana entrò la fin.
 

Pas d'abonats

Mas d’autre caire, afirmèt que “La Setmana semblava pas pro un projècte d’avenidor”, qu’aviá pas d’abonats.
   
Dins aquel sens, Roux planguèt que i aguèsse pas agut una discriminacion positiva de part dels que defendián la publicacion, mas negativa envèrs l’ÒPLO. Aquí lo jornalista li demandèt s’èra pas justament la tòca de l’ÒPLO d’exercir aquela discriminacion positiva envèrs La Setmana. “As rason —çò respondèt Roux— a una condicion per o far: cal que i aja d’abonats al jornal e n’i aviá pas. N’i aviá pas per Plumalhon, n’i aviá pas per Papagai e n’i aviá pas per La Setmana”.
   
Interrogada per Jornalet, la gerenta de la desapareguda societat Vistedit, Brigitte Bouncer, diguèt que La Setmana aviá unes 700 abonats del temps que Papagai n’aviá a l’entorn de 300 e Plumalhon 500.
 
 
Cambiament de natura de l’occitanisme
 
Interrogat sus la crisi de l’occitanisme, lo conselhièr regional occitanista reconeguèt que la situacion es marrida. “Pensi que sèm dins un caireforc istoric ont trenta annadas de militantisme occitan an fach quicòm: an fach conéisser lo nom d’Occitània per exemple, [...] e uèi aquela activitat militanta a de besonh d’un cambiament de natura”.
 
D’efièch, Roux precisèt que “i a de mens en mens d’argent public”, malgrat que i aguèsse “mai d’argent qu’abans sus la planeta ”. Per aquela rason assegura que “i a un cambiament del finançament d’activitats culturalas e lingüisticas occitanas que se fasián normalament abans e que uèi venon complicadas”.
 
 
“Las associacions pòdon pus portar la responsabilitat màger”
 
Segon Roux, “lo trabalh de conscientizacion militanta el n’a pas faita la pròva”. Dins aquel sens, precisa que las activitats de las associacions an pas capitat a cambiar “lo pòble occitan, los elegits de las institucions”. Per tant, “benlèu cal començar de pensar que l’investiment prioritari se deu far al nivèl de l’accion publica, al nivèl de las collectivitats, e que deuriá benlèu èsser a la carga de las collectivitas de desvolopar, de metre en plaça una politica en favor de la lenga e de la cultura occitanas”.
 
Tot comptat e rebatut, segon Roux “cal contunhar de bolegar lo vejaire del mond sus nòstra lenga, sus çò que sèm, sus nòstra cultura e tot aquò, e per bolegar tot aquò —se pòt pas faire autrament— aquò deu passar per una politica publica”.
 

 

---

Podètz escotar l'entrevista dins l'àudio çai jonch, o sul sit  Soundcloud de Ràdio País a partir de la minuta 39.
 
La reaccion de Vistedit a l'entrevista es arribada lèu sus Facebook.