Los salariats de l’entrepresa Irisbus-Iveco d’Anonai (Naut Vivarés) son estats estonats en legissent sul jornal economic La Tribune que lo vicepresident de l’entrepresa, Pierre Lahutte, reclamava “al govèrn un chòc de competitivitat sus la man d’òbra manufacturièra”.

Dins una entrevista concedida fa qualques jorns a aquel jornal, lo responsable de l’entrepresa de buses e d’autocars estimava que los còstes salarials èran tròp nauts dins l’Estat francés e frenavan la competitivitat. “Lo còst orari es de 28 èuros a Anonai dont 14 èuros son de cargas socialas. Per contra aquel còst es de 12 èuros en la Republica Chèca”.
 
Ja en setembre, lo jornal numeric Le Dauphiné Libérépublicava de declaracions de Lahutte ont disiá que los còstes salarials alentavan l’exportacion, mai que mai cap a Alemanha. Mas en La Tribune, lo dirigent d’Irisbus-Iveco es anat mai luènh: “se los còstes davalan pas, i a un gròs risc sus l’activitat en França”. Aquelas intencions tirèron l’atencion del telejornal de TF1, que diluns passat se questionava sul possible barrament de l’usina.
 
“Sénher Lahutte, segurament, a volgut far passar un messatge politic quand pertot se parlava de competitivat”, çò analisava un delegat del personal. “Ça que la, sèm inquiets e plan atentius, mai que mai après qu’una delegacion chinesa aja fach doas vesitas a l’entrepresa fa gaire, e se sap pas perqué”.
 
Vista la manca de dialòg social, los salariats an demandat per uèi, diluns, la convocacion d’un comitat central extraordinari.