Lo ministèri public de l’Arabia Saudita demanda la pèna capitala per Israa Al Ghomgham, una activista pels dreches umans arrestada en 2015 per “d’activitats antiestablishment”. Cap d’avocat l’a pas defenduda.
 
Se la senténcia s’executèsse, ela seriá la primièra femna saudita a qui se seriá aplicat la pena de mòrt per de rasons politicas. Son delicte es d’aver participat a de manifestacions pacificas per demandar la fin de la discriminacion de l’estat contra la minoritat shiita e la libertat dels presonièrs de consciéncia. Lo 28 d’octòbre que ven, un tribunal deurà confirmar o refusar la condemna.
 
Diluns passat, qualques mèdias e los rets socials raportèron qu’èra estada executada, mas aquela informacion èra falsa.
 
L’avenir d’Israa Al Ghomgham es entre las mans d’un tribunal de Riyad, qu’en novembre de 2017 dictèt l’implantacion d’una polemica lei antiterrorista, que penaliza los insultes contra lo rei e los actes considerats coma “terroristas”.
 
Segon l’Organizacion Saudita Europèa pels Dreches Umans (ESOHR segon sa sigla en anglés), aquel tribunal es “un organisme totalament parcial, contrarotlat pel rei”. “Sas senténcias son ja dictadas abans lo jutjament, totjorn en armonia amb lo discors oficial de l’estat”. Atal o afirmava un rapòrt publicat per aquela organizacion la setmana passada, qu’ara es estat levat d’Internet e n’avèm sonque la referéncia que ne faguèron qualques mèdias.
 
 
Qual es Al Ghomgham?
 
Israa Al Ghomgham es originària de la vila portuària de Qatif, dins la Província de l’Èst de l’Arabia Saudita, ont i a una fòrta preséncia de musulmans shiitas e que, pendent las Primas Aràbias dels ans 2011 e 2012, venguèt un dels principals fogals de protèstas e de repression e violéncia: de milièrs d’activistas foguèron assassinats o arrestats. Es alavetz qu’Israa Al Ghomgham se faguèt conéisser per son engatjament en favor dels los dreches de las femnas, contra la persecucion dels shiitas en Arabia Saudita e per aver criticat lo regim del rei Muhammad Bin Salman.
 
 
65 executats en 2018
 
I a pas de donadas oficialas sus las personas executadas pel regim saudita. Segon lo Centre Cornell sus la pena capitala, fins al 15 d’agost l’estat aviá tuat almens 65 personas. Pasmens, segon lo calcul fach per l’Agéncia de Premsa Francesa (AFP), fins al 17 de julhet passat lo nombre d’executats èra de 73. Amnestia Internacionala denóncia que lo nombre real de senténcias de pena de mòrt siá probablament fòrça superior al nombre d’execucions conegudas.
 
Tanpauc se pòt pas confirmar lo nombre de personas encarceradas a l’espèra d’èsser executadas, a causa de la manca de donadas oficialas. L’ESOHR assegura qu’a l’ora d’ara n’i a, almens, 51 dont 8 èran de menors quand foguèron arrestats o quand cometèron los crimes que ne son acusats.
 
Los tribunals sauditas impausan la pena capitala per de delictes associats al trafec de las drògas o per de conduchas coma la “mascariá” o l’“adultèri”.
 
“Fòrça personas foguèron condemnadas a mòrt dins de jutjaments injustes davant de tribunals que las declarèron colpablas sens metre en examen adeqüatament las denóncias” —çò ditz Amnestia Internacionala. “Las confessions dels acusats son obtengudas mejançant la constrencha e la tortura”, çò apond. En mai d’aquò, l’organizacion umanitària assegura que las familhas dels condemnats sabon pas jamai quora seràn executats e quitament pas quora los an executats.
 
Segon Amnestia Internacionala, l’Arabia Saudita es lo tresen país del Mond en nombre d’execucions per an, darrièr China e Iran. En 2017, l’estat executèt gaireben cent cinquanta personas.
 
 
Los dreches de las femnas, practicament inexistents
 
Israa Al Ghomgham es activista pels dreches de las femnas dins un país ont l’egalitat de genre es dramaticament absenta. Las femnas an de besonh d’una autorizacion d’un òme tutor —paire, marit, fraire o filh— per far d’estudis superiors, cercar un emplec, viatjar o se maridar. En mai d’aquò, las femnas sauditas son pas protegidas contra la violéncia sexuala ni cap de mena de violéncia contra lor condicion de femnas, çò denóncia Amnestia Internacionala.
 
Ça que la, l’Arabia Saudita fa partida de la Comission dels Dreches de las Femnas de Nacions Unidas dempuèi lo 1r d’abril de 2017, e de l’entitat per l’Egalitat de Genre e l’Autonomizacion de las Femnas, tanben de las Nacions Unidas, dempuèi lo 1r d’abril passat. Human Rights Watch o critica.
 
 
Una residéncia en Occitània
 
La monarquia saudita a de bonas relacions amb los caps de govèrn dels estats que tòcan Occitània, en particular amb l’estat espanhòl que li vend d’armas. E mai, a una residéncia a Valàuria (Vencenc), çò que faguèt polemica per s’èsser fach privatizar la plaja de la Mirandòla.
 
Fa qualques jorns, l’Arabia Saudita rompèt sas relacions diplomaticas amb Canadà a causa d’una fiulada sus Twitter de la ministra dels afars exteriors canadenca que condemnava la detencion de doas activistas dels dreches umans.