Actualitats
Val d’Aran. Garòs qu’a celebrat era prumèra Mongetada
Era tòca dera hèsta qu’ei d’arrecuperar un producte de proximitat
Dimenge passat, 4 de noveme, en Garòs (Val d’Aran) s’i debanèc era Mongetada, ua hèsta d’arrecuperacion dera mongeta tradicionau deth país, segontes era varietat de Bossòst, organizada peth Grèmi d’Ostaleria dera Val d’Aran e per Ajuntament de Naut Aran. Ath delà d’ua jornada gastronomica, ua seguida d’actes que portèren era memòria deth país.
Dempús de dus dies de vesites culturaus e de concèrts, dimenge peth maitin quauques exibicions sus eth trabalh dera mongeta siguèren completades damb ua exibicion de trabalhs en bòsc e dances araneses a cargue dera còlha de Santa Maria de Mijaran.
Mès tard, codinèrs de renom qu’aufriren un dinnar basat sus plats exquisidi, toti codinadi damb mongeta de Bossòst. Un plat de mongetes damb misharnons e ueu, un mar-e-montanha de mongetes damb fruts de mar, e mongetes damb anhèth; qu’estonèren eth cèu dera boca des participaires. Damb toti es bilhets venudi, e mès de 300 persones en dinnar, be podem parlar d’ua capitada.
Ath delà d’ua hèsta d’arrecuperacion d’un producte tradicionau dera val, “er objectiu dera hèsta ei hèr-la conéisher e qu’es restaurants dera Val d’Aran, quan i aurà pro de produccion de mongeta, poguen aufrir aguest plat mès tipic damb productes autoctòns”, ce declarèc Juan Antonio Serrano, president deth Grèmi d’Ostalaria dera Val d’Aran.
Deth sòn costat, César Ruiz Canela Nieto, baile de Naut Aran, felicitaue as vesins de Garòs: “en Naut Aran totes es activitats, o hèires o hèstes, se hèn en Arties o en Salardú que son es pòbles mès grani qu’avem; creigui qu’a estat ua iniciativa fòrça bona per toti es vesins deth pòble de Garòs de voler hèr-i aguesta hèsta”.
Eth vicesindic d’Aran, Luis Carlos Medina, que celebraue que s’arrecuperèsse un producte tradicionau e que s’ensenhèsse as joeni, que non an coneishut cap era produccion tradicionau, ne era agricultura ne era ramaderia. “Ei un ahèr de memòria culturau, de memòria gastronomica e de memòria identitària; e tanben ei un ahèr economic. Eth hèt de promòir ua economia locau e de proximitat ei fòrça important enes tempsi que viuem ara”, ce declarèc eth vicesindic.
Ferriòl Macip
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
De qu'es la receta de la mongeta ?
Òsca per aquesta mongetada capitada
La mongetada apelada atal es pas una especialitat aranesa ... se fa d'en pertot dins una grand part del ponent (l'Oest) d'Occitània.
Caldria trabalhar damb los productors occitans de mongetas de l'Estat Francés per popularizar aquesta practica occitana de las convivialas
I a un eslogan tot trobat "Farem tot Petar"
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari