Los presidents de Serbia, Aleksandar Vučeć, e de Kosova, Hashim Thaçi, an confirmat qu’a començat una negociacion per que Serbia reconesca l’independéncia de Kosova e una modificacion de las frontièras entre los dos estats. Vučeć e Thaçi o rendèron public dissabte passat en Àustria dins l’encastre d’un eveniment organizat per l’European Forum, e se mostrèron estabosits de las reaccions contràrias qu’èran arribadas de l’Union Europèa a la modificacion de las frontièras.
 
Lo president sèrbe diguèt que compreniá pas “qu’ara qu’[avançavan] amb de convèrsas substancialas entre Belgrad e Prishtina qualqu’un [metèsse] en question çò que [fasián]”. Sus la meteissa linha, lo president de Kosova diguèt que “seriá incomprensible que l’Union Europèa o un de sos estats membres se poguèsse opausar a un acòrdi entre [eles] dos, e mai s’aquel acòrdi incorporèsse un nòu dessenh de la frontièra”.
 
Coma o raportèrem lo 17 d’agost passat, los dos govèrns son dispausats a pachar una modificacion de las frontièras sortidas de la guèrra. Kosova pòt autrejar a Serbia lo contraròtle de las municipalitats de majoritat sèrba del nòrd de Kosova; en escambi, Serbia donariá a Kosova doas vals abitadas per aperaquí cent mila albaneses.
 
Aquel escambi permetriá d’eliminar lo principal problèma existent a l’ora d’ara en Kosova, ont los endreches de majoritat sèrba reconeisson pas l’independéncia. La possibla modificacion de la frontièra las daissarà pas totas fòra Kosova, mas las pus importantas si, las del nòrd, qu’an una continuitat territoriala amb Serbia. Per justificar aquela cession, Kosova recebriá las doas vals sèrbas de la frontièra pobladas majoritàriament d’albaneses.