Lo cònsol màger del vilatge de Dolus-d’Oléron, Grégory Gendre, a entamenat una lucha contra l’installacion d’un McDonald’s qu’a engatjat tota l’illa d’Oleron. A la rintrada, se deu finir una batalha judiciària de quatre ans entre la societat estatsunidenca e l’illa santongesa.
 
Èx-salariat de Greenpeace, Gendre refusèt en 2014 la sollicitacion d’i establir un McDonald’s. Dins la davalada de 2017, la justícia francesa decidiguèt que i aviá pas cap de basa legala per rebutar l’establiment estatsunidenc e doncas que la comuna deviá donar los permeses de bastir lo restaurant o ben pagar 300 èuros per cada jorn que passariá. Gendre depausèt un recors e lo verdicte deu èsser prononciat aqueste mes de setembre. Mentretant, las tensions an aumentat e l’illa se mobiliza, çò rapòrta The Guardian.
 
D’un costat, qualques oleroneses revendican lor drech de poder manjar un Big Mac se vòlon. De l’autre, d’abitants de l’illa estampan de camisetas amb d’eslogans contra los hamburgers inspirats de las protèstas de mai de 1968. Las camisetas demandan als insulars de s’engatjar. L’argument principal contra l’establiment d’aquel restaurant es mai que mai environamental, a causa de las nombrosas escobilhas que genèra, del temps que de mai en mai se cèrca “una vida alternativa luènh del consum massís”.
 
Mentretant, Gendre a promés de promòure una alternativa sostenibla en renovelant un ancian club de vacanças e una zòna comerciala alternativa amb de projèctes duradisses e de manjar biologic. Parallèlament, una peticion en linha contra l’installacion de McDonalds sus l’illa a atench mai de 82 000 signaturas.
 
Apelada Ile d’Olerun en santongés, l’illa d’Oleron es l’illa pus granda de l’archipèla charantés. Es situada a qualques desenats de quilomètres al nòrd de l’estuari de Garona en Gironda. Es un endrech plan conegut pel torisme. Dins l’ivèrn, a 22 000 abitants mas dins l’estiu n’a unes 300 000. Lo vilatge de Dolus-d’Oléron es pichon e a aperaquí 3000 abitants dins l’ivèrn.
 
 
Milhau: lo precedent occitan
 
 20 ans  son ja passats après que l’occitan José Bové, en aquel temps sindicalista païsan, se faguèt conéisser per lo nomenat “desmontatge del McDonald’s de Milhau“. Alavetz, lo 12 d’agost de 1991, de païsans roergasses de qualques sindicats agricòlas desmontèron lo McDonald’s que se bastissiá a Milhau. Cinc agricultors foguèron meses en examen, e Bové e d’autres tres païsans foguèron condemnats a qualques meses de preson. Durant lo jutjament, lo 30 de junh de 2000, aperaquí 40 000 manifestants s’acampèron davant lo tribunal correccional de Milhau per sosténer l’accion païsana.
 
Dins los ans 1980, l’accion dels païsans de Larzac èra mai que mai una responsa a las taxas que los Estats Units impausavan al formatge de Ròcafòrt.
 
Ara, McDonald’s a plan capitat dins l’estat francés ont vend dos milions de repaisses per jorn. D’efièch, França es un dels païses europèus ont McDonalds a un profièch economic pus grand.