Per respondre a l’amassada daus catolics d’Alliance Vita, daus limotjauds se mobilizeren e se potoneren per lo maridatge e l’adopcion per tots.

Lo 23 d’octòbre, l’associacion Alliance Vita amasset a Limòtges’na centenada de personas contra lo maridatge omosexuau. L’i eran notadament  Camille Geutier e Rémy Viroulaud, conselhiers municipaus UMP de la vila.
 
En reponsa, se lancet sus los malhums sociaus’n’apelada a una potonejada (kiss-in en anglés) en favor daus drechs daus parelhs omosexuaus.
 
Quela manifestacion, sostenguda per los jòunes ecologistas dau Lemosin, SOS Racisme e ZigZa-Gay  reüniguet mai de 250 personas dissabde 3 de novembre sus la plaça de la Mòta dins lo centre istoric de Limòtges. Los participants se potoneren en musica en tot començar per Wind of Change daus Scorpions.
 
Per Florent Mignot, militant daus jòunes ecologistas, “quò fai plaser de veire Limòtges se bolegar a l’entorn d’una iniciativa ciutadana dans un esperit fòrça bon”.
 
Quela potonejada se vòu la primiera d’un moviment qu’es a s’espandir en França e en Occitània. D’autras son previsdas a Bordèu, Marselha, Niça e Baiona.
 
Potonejadas venentas en Occitània:
 
- Marselha, lo 17 de novembre a 14h davant la merariá
- Bordèu, lo 8 de decembre davant la merariá
- Niça, lo 17 de novembre a 15h plaça Masséna
- Baiona, lo 17 de novembre a 16h sus la plaça de la merariá
 
 
 
 
 
Maime Caillon