A l’estanh de Taur (Montpelhierenc) an trobat 1218 tonas de muscles mòrts a causa de la calor.  La malaiga, es a dire, l’abséncia d’oxigèn dins lo mitan marin favorizada per las fòrtas calors, a fach pèrdre als elevaires de l’estanh tota lor recòlta, çò rapòrta Le Monde. La malaiga èra pas tornada dins l’estanh dempuèi 2006.
 
Dijòus de matin, se tenguèt un comitat d’expertesas departamental amb los representants dels conquilicultors de Taur, que confirmèt las chifras presentadas dins lo rapòrt d’una mission de terrenh efectuada de 14 al 20 d’agost. “Per quant a las ustras, avèm de tausses de mortalitat d’un 52% dins la zòna de Marcilhan e d’un 63,5% dins aquela de Mesa”, çò indiquèt Cédric Indjirdjian, director departamental adjonch dels territòris de la mar. “En volum, aquò representa 2703 tonas d’ustras; en valor, 4,7 milions d’èuros, siá un tèrç de la produccion annala sul bacin qu’es estat destruch en qualques jorns. Per quant als muscles, las pèrdas son d’un 100%, siá 1218 tonas de muscles mòrts, çò que representa 1,22 milions d’èuros.
 
Lo prefècte del departament d’Erau cèrca la reconeissença del sinistre per arrestat ministerial.
 
L’estanh de Taur s’estend près de Seta sus unas 7000 ectaras. Es un ecosistèma excepcional e la zòna conquilicòla pus importanta de la Mediterranèa. Aquel sector emplega 3000 personas.