La mediatritz europèa, Emily O’Reilly, a publicat un rapòrt fòrça dur contra lo president de la Comission Europèa, Jean-Claude Juncker, a prepaus del biais de nomenar l’alemand Martin Selmayr secretari general e òme de fisança. La nominacion foguèt polemica e los critèris politics passèron per dessús los meritis.
 
Lo rapòrt mençona qualques aspèctes de marrida gestion de part de Juncker dins l’escàndol conegut coma lo Selmayrgate. O’Reilly critica que se manquèsse d’independéncia administrativa o que se generèsse una falsa sensacion d’urgéncia per tal d’accelerar la procedura de nominacion. Tanben desapròva totes los comissaris: “Es extraordinari que cap de d’eles metèsse pas en en question la procedura d’eleccion del secretari general”. En mai d’aquò, la Comission Europèa (CE) es tanben acusada d’aver agit amb opacitat e puèi amb agressivitat quand deguèt respondre a las acusacions de marrida practica.
 
 
L’escàndol del Selmayrgate
 
L’eleccion de Martin Selmayr coma secretari general de la Comission Europèa (CE) portèt en març passat un escàndol a Brussèlas, a causa dels procediments de l’eleccion. Coma o raportàvem dins Jornalet, Selmayr foguèt lo cap del gabinet del president de la CE, Jean-Claude Juncker, fins al 21 de febrièr, quand foguèt promogut d’un biais fòrça escur.
 
Ne desvelèt l’escàndol lo jornalista de Libération, Jean Quatremer, que denoncièt d’irregularitats dins los procediments de concurréncia e transparéncia per que d’autres foncionaris poguèsson postular. Delà son blòg dins lo jornal francés, Quatremer publiquèt tanben un article en anglés dins The Spectator, ont explicava quitament que Juncker èra las e que Selmayr èra ja de facto lo president de la CE, en tot manipular Juncker coma “una marioneta”.
 
 
Lo ròtle vergonhós de Schinas
 
Quand se destapèt l’escàndol, intrèt en accion la figura del pòrtavotz en cap de la Comission, lo grèc Margaritis Schinas. El ensagèt de protegir sos collègas en luòc de respondre a las questions que li pausavan los jornalistas. Schinas temptèt d’esquivar l’escàndol, en disent que s’èra respectat totes los procediments legals “de manièra religiosa” dins la designacion de Selmayr coma secretari general. Davant la marrida umor e l’exasperacion d’Schinas, lo jornalista Quatremer li diguèt net e clar: “Aquelas institucions vos apertenon pas a vos, mas als ciutadans europèus, e avèm tot lo drech de vos pausar de questions, e de vos repetir tantes còps coma voldrem, sens que vos calga nos donar de leiçons de moralitat”. Dins lo vidèo que seguís podètz veire la conferéncia de premsa.