La fèsta foguèt pas totala aqueste dissabte a Brutus; Tolosa foguèt pas tanpauc a la fèsta a Londres; las pelhòfas australianas son plan lançadas. Atal, se pòt resumir la dimenjada tretzista.

Arbitratge e parallaxi
 
Dissabte, los Dragons tornavan trapar Brutus. Fasián lo torn d’onor amb la Cup abans d’entamenar la partida contra lo primièr, Saint Helens, dins un revenge de la mièja finala de Bolton. La partida foguèt de las bonas. A dètz minutas de la fin, los catalans menavan 22-14. Mas los angleses anavan marcar dos còps abans la còrna per ganhar 26-22. L’arbitre vesiá pas las passas endavant sus las doas atacas, demandava pas lo vidèo e autrejava los dos ensages sens trastejar. Un arbitre qu’èra ja vengut a Perpinhan per arbitrar la partida contra Wigan ont obligèt los locals de jogar una mièja ora sens palma en multiplicant los còps de fiulet. La Liga l’aviá mandat per quatre partidas a l’escalon inferior. E aqueste còp? Lo director de la Rugby-League s’es adreiçat al grop arbitral de Perpinhan: “Sètz la vergonha de la Superliga.”
 
Divendres de ser, los catalans aniràn desfisar Wakefield. Enjòc d’aicí la fin del mes: passar lor adversari al classament e daissar la 8a plaça.
 
 
Los londinencs refrejan l’estrambòrd tolosan
 
Lo Tolosa Olimpic jogava una partida importanta dimenge de vèspre a Londres. Los occitans dintrèron pas jamai dins la partida fàcia a una formacion plan motivada. La nòta es salada: desfaita 34-8.
 
Tolosa passa en seisena posicion dels 8-del-Mitan e se prepara a un viatge complicat a Toronto. Una resulta positiva relançariá los occitans dins la corsa a la montada en Superliga ont jogaràn pas, l’an que ven, Widnes e Halifax qu’an totjorn pas marcat un punt dins aquesta competicion. Mas lo format de la competicion es pas encara determinat: 12 o 14 esquipas, Super-8 o pas?
 
 
NRL: Melbourne e Sydney anóncian la color
 
En Austràlia, las pelhòfas se dobriguèron dijòus per una partida supèrba a Melbourne que vegèt los locals batre los Lapinons 29-28. Dins l’autra partida del naut del tablèu, los Polets de Sydney escartan Cronulla: 21-12.
 
Los neozelandeses se retrobavan qualificats pel primièr còp dempuèi 2011 ont joguèron la finala, mas poguèron pas res faire a Penrith: desfaita 12-27. Brisbane se fa batre sus sa pelena per una formacion de Sant Jòrdi-Illawarra sens pietat: 48-18!
 
Melbourne e Sydney seguiràn amb interés las partidas de barratge: Cronulla-Penrith, divendres; Lapinons-Dragons dissabte.
 
 
 
 
Alan Roch